ဂွတမြို့လုံးနီးပါး သိမ်းပြီးကြောင်း AA ကြေညာ၊ ခမရ (၅၆၂) က တပ်ဖွဲ့ဝင်ရာနဲ့ချီပြီးထွက်ပြေးနေ

ရခိုင်ပြည်နယ်နဲ့ ဧရာဝတီတိုင်းနဲ့ နယ်နမိတ်ချင်းဆပ်စပ်နေတဲ့ ဂွမြို့ရဲ့ ၃ပုံ ၂ပုံခန့်ကို သိမ်းပိုက်ထားနိုင်ပြီလို့ အာရက္ခတပ်တော် AA က ဒီနေ့မနက်ပိုင်းမှာ ထုတ်ပြန်ပြောပါတယ်။ဂွမြို့နယ်အတွင်းက စစ်ကောင်စီတပ်တွေကို ထိုးစစ်ဆင်နေပြီး စစ်ကူလာတဲ့ တပ်မ ၁၁ လက်အောက်ခံတပ်ရင်းတွေနဲ့ အခြားသောတပ်ရင်းပေါင်းများစွာနဲ့လည်း တိုက်ပွဲပြင်းထန်နေတယ်လို့ သိရပါတယ်ဂွမြို့ပေါ်မှာ အခြေစိုက်ထားတဲ့ ခမရ ၅၆၃ တပ်ရင်းကို AA က သိမ်းပိုက်လိုက်ပြီး ခမရ ၅၆၂ တပ်ရင်းထဲက စစ်ကောင်စီတပ်ဖွဲ့ဝင် ရာနဲ့ချီဟာထွက်ပြေးနေတယ်လို့ ဒေသတွင်းသတင်းမီဒီယာတွေက ဖော်ပြထားပါတယ်။စစ်ကောင်စီဟာ ဂွ – ငါးသိုင်းချောင်း ရိုးမလမ်း ရေနံ့သာလမ်းဆုံအနီးက အမှတ် (၃၄၄) အမြောက်တပ် အမတ-၃၄၄ကို လုံခြုံရေးအင်အားတိုးမြှင့်ပြီး လက်နက်ကြီး ပစ်ကူနေရသလို ဂွရိုးလမ်းပေါ်က ဒေါင်းချောင်းနဲ့ ဗေဒါစစ်ဆေးရေးဂိတ်ကိုပါ AA က သိမ်းပိုက်လိုက်ပြီလို့ စစ်ရေးသတင်းအရင်းမြစ်တွေထံက သိရပါတယ်။

ဂွ ကျဆုံးပါက စစ်ကောင်စီဟာ ဧရာဝတီကို အာရက္ခတပ်တော်နဲ့ PDF တွေ ဝင်ရောက်လာမှာစိုးရိမ်ပြီး တိုင်းအတွင်းက မြို့နယ်တွေမှာ လုံခြုံရေးတွေ အထူးတိုးမြှင့်ထားတယ်လို့ သိရပါတယ်။ဧရာဝတီတိုင်းထဲက ကွင်းကောက်၊ အင်္ဂပူ၊ မြန်အောင်၊ ကြံခင်းစတဲ့မြို့တွေအပြင် ဂွ-ငသိုင်းချောင်းကနေ ရေကြည်၊ အသုတ်၊ ကျောင်းကုန်းလမ်းခွဲစတဲ့ နေရာတွေမှာ လုံခြံရေးတိုးမြှင့်ပြီး တောက်လျှောက် ခံစစ်ပြင်နေတယ်လို့ သိရပါတယ်။ဂွမြို့ကို အပြီးသတ်သိမ်းပိုက်ပြီးပါက အာရက္ခဒေသအတွင်း စစ်တွေ၊ ကျောက်ဖြူ နဲ့ မာန်အောင်မြို့ (၃) မြို့သာ ဆက်လက်သိမ်းပိုက်ဖို့ ကျန်ရှိတော့မယ်လို့ AA က ထုတ်ပြန်ချက်မှာ ဖော်ပြပါတယ်။စစ်ရေးလေ့လာသူတွေကတော့ ဂွမြို့သိမ်းပိုက်ပြီးပါက အာရက္ခတပ်တွေ ဧရာဝတီကို ဝင်ရောက်တိုက်ခိုက်လာနိုင်ပြီး ပြည်တွင်းပိုင်းထိ ထိုးဖောက်လာနိုင်တယ်လို့ သုံးသပ်နေကြပါတယ်။