အမ်း-ပဒါန်းလမ်းပိုင်းမှာ ဖမ်းမိခဲ့တဲ့ ဗိုလ်ကြီး ၁ဦးအပါ ၁၂ဦး သုံ့ပန်းတွေကို ဆေးကုသပေးနေ

ရခိုင်နဲ့ မကွေးအစပ် အမ်း-ပဒါန်းလမ်းပိုင်းမှာ ဖမ်းမိခဲ့တဲ့ ဗိုလ်ကြီး ၁ဦးအပါ ၁၂ဦးရှိတဲ့ စစ်သုံ့ပန်းတွေကို ဆေးကုသပေးနေတယ်လို့ အရှိုချင်းကာကွယ်ရေးတပ်ဖွဲ့က အသိပေးပါတယ်။အာရက္ခတပ်တော် (AA) ထိုးစစ်ဆင်မှုကို ခံနေရတဲ့ အမ်းမြို့နယ်အခြေစိုက် အနောက်ပိုင်းတိုင်းစစ်ဌာနချုပ် ကွပ်ကဲမှု လက်အောက်ရှိ တမိုင်ကုန်းစခန်းကနေ ဆုတ်ခွာလာတဲ့ ဗိုလ်မှူးဇော်ထက်နောင် ဦးစီးစစ်ကြောင်းက ဖမ်းမိခဲ့တဲ့ သုံ့ပန်းတွေဖြစ်ပါတယ်။

အဆိုပါစစ်ကြောင်းကို ကျောင်းသားလက်ရုံးတပ်တော်နဲ့အတူ မင်းဘူးခရိုင်တပ်ရင်း ၂နဲ့ အရှိုချင်းကာကွယ်ရေးတပ်တို့ က အမ်း-ပဒါန်းလမ်းတနေရာမှာ ပိတ်ဆို့တိုက်ခိုက်ခဲ့ဖြစ်ပြီး စစ်သား ၂ဦးသေဆုံးကာ ဗိုလ်ကြီး ၁ဦးအပါအဝင် ၁၂ဦးကို သုံ့ပန်းအဖြစ် ဖမ်းဆီးရမိခဲ့တာပါ။ဖမ်းဆီးရမိတဲ့ စစ်သုံ့ပန်းတွေကို ဆေးကုသမှုပေးနေပြီး ကျန်းမာရေး၊ နေထိုင်စားသောက်ရေးကအစ လိုအပ်တဲ့ ကိစ္စအဝဝကို ဖြည့်ဆည်းပေးပြီး စောင့်ရှောက်ထားတယ်လို့ အရှိုချင်းကာကွယ်ရေးတပ်က ဆိုပါတယ်။

အဆိုပါသုံ့ပန်းတွေနဲ့အတူ Laptop တစ်လုံး၊ Phone တစ်လုံး၊ MA-1 တစ်လက်၊ MA-3 တစ်လက် (5.56 ကျည် ၂၃ တောင့်)၊ Type-81 တစ်လက် (ကျည်ဘောက်မပါ)၊ ပစ္စတို တစ်လက် (ကျည် ၂၄ တောင့်) အားသိမ်းဆည်းရမိခဲ့တယ်လို့ သိရပါတယ်။ဒါ့အပြင် ဒေသအသီးသီးရှိ စစ်ကောင်စီတပ်ဖွဲ့ဝင်တွေအနေနဲ့ မိမိတို့အပေါ် အနိုင်အထက်ပြုတဲ့ စစ်အာဏာရှင်တွေအတွက် အသေခံတိုက်ခိုက်မလား ထွက်ပြေးတိမ်းရှောင်ကာ ပြည်သူနဲ့အတူ ရှင်သန်ရပ်တည်မလားဆိုသည်ကို စဥ်းစားဆုံးဖြတ်စေလိုတယ်လို့ အရှိူချင်းကာကွယ်ရေးတပ် (ACDF)၊ New Society Army (NSA)၊ ပြည်သူ့လွတ်လပ်ရေးတပ်တော် (PIA)တို့က ပူးတွဲသတင်းထုတ်ပြန်ထားပါတယ်။