ဗန်းမော်မြို့က တပ်စခန်းအများအပြားကို KIA သိမ်းပိုက်ထားပြီး လက်နက်ခဲယမ်းတွေရရှိ၊စကခ ၂၁တပ်မှူးနဲ့ ဒုတပ်မမှူးတို့ ပုန်းအောင်းခုခံနေ

ကချင်ပြည်နယ်၊ ဗန်းမော်မြို့သိမ်းတိုက်ပွဲအတွင်း စစ်ကောင်စီတပ်စွဲထားတဲ့ ဗန်းမော်နည်းပညာတက္ကသိုလ် အပါအဝင် တပ်စခန်းအများစုကို ဆက်တိုက်သိမ်းပိုက်နေပြီး စကခ ၂၁တပ်မှူး နဲ့ အရာရှိအချို့မှာ ပုန်းအောင်းခုခံနေတယ်လို့ ကချင်စစ်ရေးသတင်းအရင်းမြစ်တွေထံက သိရပါတယ်။ဗန်းမော်မြို့ကို ဒီဇင်ဘာ ၄ရက်နေ့ကစတင်ပြီး KIA က ထိုးစစ်ဆင်ခဲ့ရာ ဒီဇင်ဘာ ၇ရက်မှာ ဗန်းမော်ထောင်လဲပွင့်သွားခဲ့ပြီး ဌာနဆိုင်ရာစုပေါင်းရုံးနဲ့ စခန်းအချို့ကိုသိမ်းပိုက်ခဲ့သလို စစ်ကောင်စီတပ်တွေ တပ်စွဲထားတဲ့ ဗန်းမော်နည်းပညာတက္ကသိုလ်ကို ဒီဇင်ဘာ ၂၂ ရက်မှာ ထိန်းချုပ်လိုက်ပြီး စစ်ကောင်စီတပ်သားအချို့ထွက်ပြေးသွားခဲ့ပါတယ်။ဗန်းမော်အခြေစိုက် စစ်ဆင်ရေးကွပ်ကဲမှုဌာနချုပ်-စကခ(၂၁)ကို KIA က ထိုးစစ်ဆင်နေဆဲဖြစ်ပြီး KIA က လက်နက်ချဖို့ ပြောနေပေမယ့် တပ်မမှူးဗိုလ်မှူးချုပ် တင်မင်းလတ်နဲ့ ဒုတိယတပ်မမှူး ဗိုလ်မှူးကြီး ထွဋ်ခေါင် အဖမ်းမခံရရေး နေရာရွှေ့ခုခံနေတာလို့ သိရပါတယ်။

ဗိုလ်မှူးချုပ်တင်မင်းလတ်ဟာ ၂၀၁၆နဲ့ ၂၀၁၇က ရခိုင်ပြည်နယ် ဘူးသီးတောင်၊ မောင်တောဒေသမှာ ရိုဟင်ဂျာတွေကို လူမျိုးတုန်းသတ်ဖြတ်မှုအတွက် ICC မှာ တရားရင်ဆိုင်ရမယ့် အဓိကတာဝန်ရှိသူတစ်ဦးဖြစ်တယ်လို့ သိရပါတယ်။ဒီဇင်ဘာ ၂၄ရက်နေ့ကလည်း ဗန်းမော်မြို့ပြင်ရှိ ကာကင်းစခန်းတွေကို KIA က ရှင်းလင်းခဲ့ရာ စစ်ကောင်စီအလောင်း ၈လောင်းခန့်နဲ့ လက်နက်များ ရရှိခဲ့တယ်လို့သိရပါတယ်။ဗန်းမော်နဲ့အတူ တရက်ထဲ စစ်ဆင်ရေးဖော်ဆောင်ခဲ့တဲ့ မံစီမြို့သိမ်းတိုက်ပွဲမှာလည်း မနေ့က ဒီဇင်ဘာ ၂၅ရက်နေ့ထိ တိုက်ပွဲတွေပြင်းထန်နေပြီး မံစီမြို့က စစ်တပ်စခန်းအချို့ကို KIA က သိမ်းပိုက်ထားကာ ခမရ ၃၁၉က တပ်ရင်းမှူးနဲ့အဖွဲ့ လက်နက်ချမှုတွေရှိနေသလို ဗျူဟာမှူး ဗိုလ်မှူးကြီးအောင်ငြိမ်းချမ်း စနိုက်ပါထိမှန်သေဆုံးခဲ့တယ်လို့ ကနဦးသိရှိရပါတယ်။