မတ္တရာအနောက်ခြမ်းက ရွာ ၃ရွာကို MDY PDF ပြန်လည်သိမ်းပိုက်၊ လက်နက်ခဲယမ်းများရရှိ

မန္တလေးတိုင်း မတ္တရာမြို့နယ်အနောက်ခြမ်းရှိ ရွာ ၃ရွာကို ပြန်လည် သိမ်းပိုက်လိုက်ကြောင်းပြည်သူ့ကာကွယ်ရေးတပ်မတော် (မန္တလေး)MDY PDF က ဒီနေ့ ဒီဇင်ဘာ ၉ရက်မှာ သတင်းထုတ်ပြန်ပါတယ်။မတ္တရာမြို့နယ် အနောက်ဖက်ခြမ်းရှိ တော်လှန်ရေးတပ်ဖွဲ့တွေ ယာယီလက်လွှတ်ခဲ့ရတဲ့ ကျေးရွာတွေကို ဒီဇင်ဘာ ၆ရက်နေ့မှာ MDY PDF က ပြန်လည်ထိုးစစ်ဆင် တိုက်ခိုက်ခဲ့ခြင်းဖြစ်တယ်လို့ သိရပါတယ်။မတ္တရာမြို့နယ် အနောက်ဖက်ခြမ်းရှိ ရွာသစ်ကျေးရွာ ၊ ဝန်စုကျေးရွာ နဲ့ ထိန်ပင်စောက်ကျေးရွာတို့ကို အပြီးသတ် ပြန်လည်သိမ်းပိုက်ရရှိပြီး ဖြစ်တယ်လို့ သိရပါတယ်။

အဆိုပါ တိုက်ပွဲများအတွင်း အကြမ်းဖက် စစ်ကောင်စီထံမှ လက်နက်ခဲယမ်းအချို့လည်း သိမ်းဆည်းရမိခဲ့တယ်လို့ ထုတ်ပြန်ချက်မှာ ဖော်ပြပါတယ်။စစ်ကောင်စီတပ်ဟာ ဒီဇင်ဘာလ ၈ ရက်နေ့ မနက်ပိုင်းက စတင်ကာ မတ္တရာမြို့နယ်အနောက်ခြမ်းရှိ ပိုဝမြောက်ရွာနဲ့ ဆင်ကုန်းရွာတို့ကို ဝင်ရောက်စီးနင်း မီးရှို့ဖျက်ဆီးနေကြောင်းလည်း Voice of Mandalay က အသိပေးထားပါတယ်။ပြီးခဲ့တဲ့ ဒီဇင်ဘာ ၂ရက်နေ့ကလည်း မတ္တရာမြို့နယ် အရှေ့ဘက်ခြမ်းရှိ မြို့ကုန်းကျေးရွာကို စစ်ကြောင်းထိုးလာတဲ့ စစ်တပ်စစ်ကြောင်းနဲ့တိုက်ပွဲဖြစ်ပွားပြီး စစ်သား ၇ဦးသေဆုံးကာ သုံ့ပန်း ၁ဦးနဲ့ လက်နက်ခဲယမ်းများသိမ်းဆည်းရမိခဲ့ပါတယ်။

စစ်ကောင်စီဟာ မန္တလေးတိုင်းထဲက ၎င်းတို့လက်လွှတ်ခဲ့ရတဲ့နယ်မြေတွေကို ပြန်လည်ရယူဖို့ စစ်ကြောင်းထိုးနေတာဖြစ်ပြီး တော်လှန်ရေးတပ်တွေက ထိန်းချုပ်စိုးမိုးထားဆဲဖြစ်တယ်လို့ MDY PDF က နိုဝင်ဘာ ၂၇ရက်မှာ ထုတ်ပြန်ထားပါတယ်။ပြည်သူ့ကာကွယ်ရေးပူးပေါင်းတပ်တွေဟာ မန္တလေးတိုင်းအတွင်းရှိ မိုးကုတ်၊ စဉ့်ကူး၊ သပိတ်ကျင်း၊ တကောင်းစတဲ့မြို့ ၄မြို့အပြင် မတ္တရာမြို့က စစ်ကောင်စီစခန်းအများစုကိုလည်း သိမ်းပိုက်ထိန်းချုပ်ထားတာဖြစ်ပါတယ်။