ရေဦး ထွေအုပ်ရုံးအတွင်း ပျူစောထီးသင်တန်းဆင်းပွဲပြုလုပ်နေစဉ် ဒရုန်းတွေနဲ့ ဗုံးသီးချတိုက်ခိုက်လို့ ဒုနယ်ထိန်း ၁ဦးအပါအဝင် ၄ဦးသေဆုံး

စစ်ကိုင်းတိုင်း၊ ရေဦးမြို့ ထွေအုပ်ရုံးအတွင်း ပျူစောထီးသင်တန်းဆင်းပွဲပြုလုပ်နေစဉ် ဒရုန်းတွေနဲ့ ဗုံးသီးချတိုက်ခိုက်လို့ ဒုနယ်ထိန်း ၁ဦးအပါအဝင် ၄ဦးသေဆုံးကာ ဒဏ်ရာရသူများပြားတယ်လို့ ရေဦးမြို့နယ် ပြည်သူ့ကာကွယ်ရေးအဖွဲ့က သတင်းထုတ်ပြန်ပါတယ်။နိုဝင်ဘာလ ၂၂ရက် မနက် ၁၀နာရီ ခွဲအချိန်မှာ ရေဦးမြို့ ထွေအုပ်ရုံးအတွင်း ပျူစောထီးသင်တန်းဆင်းပွဲပြုလုပ်နေစဉ် Fixed-Wing Droneများဖြင့် ဗုံးသီး ၉ လုံးကြဲချ၍တိုက်ခိုက်ခဲ့ခြင်းဖြစ်တယ်လို့ သိရပါတယ်။တိုက်ခိုက်မှုအတွင်း ဒုနယ်ထိန်း ရဲ ၁ဦးအပါအဝင် စစ်သားနဲ့ပျူ ၄ ဦး ဗုံးသီးအစထိမှန်​သေဆုံးကာ အများအပြားထိခိုက်ဒဏ်ရာရရှိပြီး ၈ဦးမှာ ဒဏ်ရာအပြင်းအထန်ရရှိလို့ ဆေးရုံမှာ အသက်လုနေရတယ်လို့ သတင်းရရှိပါတယ်။အခုတိုက်ခိုက်မှုကို ရွှေဘိုခရိုင်အမှတ် ၁၄ တပ်ရင်း(ရေဦးPDF) နှဲ့ ရေဦးမြို့နယ် ပ.က.ဖ ပူးပေါင်းလုပ်ဆောင်ခဲ့ခြင်းဖြစ်တယ်လို့ သိရပါတယ်။ပြီးခဲ့တဲ့အောက်တိုဘာလအတွင်းကလည်း ရေဦးမြို့ ရွှေကျီးမင်း စစ်တပ်ဂိတ်၊ ရေဦးစစ်တပ်အထိုင်နေရာနဲ့ အောင်သာယာပျူစောထီးရွာတို့ကို ဒရုန်းတွေနဲ့ တိုက်ခိုက်လို့ တပ်ကြပ် ၁ဦးအပါအဝင် စစ်သားနဲ့ပျူ ၁၅ဦးသေဆုံးပြီး အများအပြားဒဏ်ရာရရှိကာ လက်နက်တွေကိုလည်း ဖျက်ဆီးနိုင်ခဲ့တယ်လို့ သိရပါတယ်။