မြေပြန့်ဒေသခရီးစဉ်အတွက် မန္တလေး PDF က တပ်သားသစ်များခေါ်ယူ

အမျိုးသားညီညွတ်ရေးအစိုးရ၊ ပြည်သူ့ကာကွယ်ရေးတပ်မတော်(မန္တလေး)က မြေပြန့်ဒေသကို ထိုးဖောက်နေပြီဖြစ်တဲ့အတွက် ခရီစဉ်အတွင်း တပ်သားသစ်တွေ ဖိတ်ခေါ်လိုက်ပါတယ်။တိုင်းရင်းသားဒေသကို အားပြုပြီး မြေပြန့်ကို ထိုးဖောက်ဝင်ရောက်လာခဲ့တဲ့ MDY PDF ဟာ အခုချိန်မှာတောင်စဉ်တောင်တန်းတွေကနေတဆင့် ဧရာဝတီမြစ်ကမ်းနံဘေးထိ ချီတက်လို့ ရောက်ရှိလာခဲ့ပြီဖြစ်တယ်လို့ အသိပေးထားပါတယ်။ရှေ့ဆက်မယ့် မြေပြန့်ဒေသ ခရီးစဉ်တွေအတွက် ရဲဝံ့တဲ့ တော်လှန်ရေးခရီးသွားဖော်တွေကို MDY PDF က လိုအပ်လျက်ရှိနေတယ်လို့ သိရပါတယ်။

ပြည်သူ့ကာကွယ်ရေးတပ်မတော် (မန္တလေး) အနေနဲ့ “စုဆောင်း ၊ လေ့ကျင့် ၊ စုဖွဲ့ ၊ တိုက်ပွဲဝင် ‘’ ဆိုတဲ့ လုပ်ငန်းစဉ် အဆင့်တိုင်း အဆင့်တိုင်းကို သက်ဆိုင်ရာ ဌာနများအလိုက် စနစ်တကျ အကောင်အထည်ဖော်ဆောင်ရွက်ကြပြီး တိုက်ပွဲပေါင်း ကြီး / ငယ် များစွာကို အနိုင်တိုက်ရုံတင်မက ပြည်သူ့လွတ်မြောက်နယ်မြေများ ဖော်ဆောင်ပေးလျက်ရှိနေတယ်လို့ ဆိုပါတယ်။

“တော်လှန်ရေးအစမှာ ကျွန်တော်တို့ ပြည်သူတွေ သီဆိုဟစ်ကြွေးခဲ့ကြတဲ့ “အရေးကြီးပြီ ညီနောင် အပေါင်းတို့ ……’’ ဆိုတဲ့ သီချင်းစာသားအတိုင်းပါဘဲ ရှေ့ဆက်ဖော်ဆောင်မယ့် မြေပြန့်ဒေသ လွတ်မြောက်ရေးအတွက် ရဲဝံ့သော ခိုင်မာသော ထက်သန်သော PDF စစ်သည် စစ်မေများစွာကို လိုအပ်လျက်ရှိတဲ့အတွက် ကျွန်တော်တို့ ပြည်သူ့ကာကွယ်ရေးတပ်မတော် (မန္တလေး) ကို အခုဘဲ ဆက်သွယ်ချိတ်ဆက်ကြဖို့ နှိုးဆော်လိုက်ရပါတယ် ။”လို့ MDY PDF က ဖိတ်ခေါ်ထားပါတယ်။