လေကြောင်းပစ်မှုများကျူးလွန်နေသည့် မန္တလေး တံတားဦးလေဆိပ်ကို ရှော့တိုက်ဒုံး ၁၂လုံးပစ်ခတ်

ဇန်နဝါရီ ၂၄၊ VOR

မန္တလေးတိုင်း၊ တံတားဦး လေတပ်စခန်း အတွင်းသို့ ၁၀၇ မမ ရှော့တိုက်ဒုံး ၁၂ လုံးပစ်ခတ်ရာ ၅လုံးပေါက်ကွဲ ခဲ့ကြောင်း Brave Warriors for Myanmar (BWM) အဖွဲ့က သတင်းထုတ်ပြန်သည်။

အဆိုပါ တံတားဦးလေဆိပ်စခန်းသည် လက်ရှိအချိန်တွင် စစ်ကောင်စီတပ်က တော်လှန်ရေး အင်အားစုများ နှင့် အပြစ်မဲ့ပြည်သူများအပေါ်လေကြောင်းတိုက်ခိုက်မှုများပြုလုပ်ရာ၌ အများဆုံး အသုံးပြုနေသည့် လေတပ် စခန်း ဖြစ်နေခြင်းကြောင့် ယခု ကဲ့သို့ တိုက်ခိုက်ရခြင်း ဖြစ်ကြောင်း ထုတ်ပြန်ချက်တွင်ဖော်ပြထားသည်။

ယမန်နေ့ ဇန်နဝါရီလ ၂၃ရက်၊ ညနေ ၄ နာရီ ၄၉ မိနစ် အချိန်တွင် မန္တလေးတိုင်း၊ တံတားဦး လေတပ်စခန်း အတွင်းသို့ ၁၀၇ မမ ရှော့တိုက်ဒုံး ၅ လုံး အောင်မြင်စွာ ပစ်ခတ်တိုက်ခိုက်ခဲ့သည်ဟု သိရသည်။

မူလပစ်ခတ်စဥ်က ၁၂ လုံးပစ်ခတ်ခဲ့သော်လည်း ၇ လုံး ပစ္စည်းချို့ယွင်းခဲ့ပြီး လေတပ်စခန်းအတွင်းသို့ ၅ ထိမှန်ပေါက်ကွဲခဲ့ရာ တပ်စခန်းထိခိုက်ပျက်စီးမှု အခြေ အနေကို ဆက်လက် စုံစမ်း နေဆဲ ဖြစ်သည်ဟု ဆိုသည်။

အဆိုပါ စစ်ဆင်ရေးကို Brave Warriors for Myanmar (BWM) အဖွဲ့၏ စီမံမှုဖြင့် မြို့ပြအထူးစစ်ဆင်ရေး (U.S.O) နှင့် အတူ မဟာမိတ်ဖြစ်သော Security and Special Task Force ( SSTF – MDY ) အဖွဲ့တို့ပူးပေါင်းလုပ်ဆောင်ခဲ့ကြောင်း သိရသည်။