မန့်ဝိန်းကြီး တိုက်ပွဲအတွင်း တရုတ်နိုင်ငံသို့ထွက်ပြေးသွားသည့် အရာရှိအပါအဝင် စစ်သား ၅၇ဦးကို စစ်ကောင်စီထံလွှဲပြောင်း

ဇန်နဝါရီ ၂၄၊ VOR

ကချင်ပြည်နယ်၊ မံစီမြို့နယ်၊ မန့်ဝိန်းကြီးကျေးရွာ စခန်းသိမ်းတိုက်ပွဲအတွင်း တရုတ်နိုင်ငံဘက်သို့ ထွက်ပြေးသွားသည့် စစ်ကောင်စီတပ်ဖွဲ့ဝင် အရာရှိ ၄ ဦး အပါအဝင် ၅၇ ဦးကို ဇန်နဝါရီ ၂၂ ရက်က ​စစ်ကောင်စီထံသို့ ပြန်လည်လွှဲပြောင်းပေးခဲ့ကြောင်း ဒေသတွင်း သတင်းအရင်းမြစ်များထံက သိရသည်။

တရုတ်တပ်မတော် တာဝန်ရှိသူ ဒုတိယဗိုလ်မှူးကြီး စုန်စီပေါက စစ်ကောင်စီ တာဝန်ရှိသူ ခလရ ၂၉၀ တပ်ရင်းမှူး ဒုတိယဗိုလ်မှူးကြီး ရွှေမောင်ထံ သို့ မန်ဝိန်းကြီး စစ်ဆေး​ရေးဂိတ်တွင် လွှဲပြောင်းပေးခဲ့ခြင်းဖြစ်ကြောင်းသိရသည်။

ပြန်လည်လွှဲပြောင်းပေးခဲ့သည့် စစ်ကောင်စီတပ်ဖွဲ့ဝင်များသည် ခမရ ၄၂၄မှ အရာရှိ ၁ ဦး၊ အခြားအဆင့် ၁၁ ဦးနှင့် မှီခို ၂ ဦး၊ ခမရ ၁၀၂ မှ အခြားအဆင့် ၁၀ ဦး၊ ဆက်သွယ်ရေးတပ်မှ အခြားအဆင့် ၂ ဦး၊ မန့်ဝိန်းကြီးရဲစခန်းမှ အရာရှိ ၃ ဦး အခြားအဆင့် ၁၁ ဦး၊ နမ့်ခမ်းမြို့သစ် ပြည်သူ့စစ် ၁၁ ဦး စုစုပေါင်း ၅၇ ဦးဖြစ်သည်ဟု သိရသည်။

မန်ဝိန်းကြီး စစ်တပ်စခန်းကို KIA, PDF ပူးပေါင်းတပ်ဖွဲ့ က ဇန်နဝါရီ ၂၁ရက် နံနက်ပိုင်းတွင် ဝင်ရောက်သိမ်းပိုက်ခဲ့ပြီး စခန်းသိမ်းတိုက်ပွဲအတွင်း စစ်ကောင်စီတပ်ဘက်မှ လက်နက်ချအညံ့ခံသူများအပြင် ထွက်ပြေးသွားသူများကို KIA,PDF က လိုက်လံချေမှုန်းလျက်ရှိရာ အင်အား ၂၀၀ ခန့်ကိုလည်း တရုတ်နယ်စပ် လမ်းတလျှောက် တွင် ပြန်လည်ဖမ်းဆီးရမိခဲ့သည်။

အဘက်ဘက်မှ စစ်ရှံးလာသည့် စစ်ကောင်စီတပ်များသည် အိန္ဒိယနှင့် တရုတ် စသည့် နီးစပ်ရာ နိုင်ငံများသို့ထွက်ပြေးလျက်ရှိပြီး အိန္ဒိယသို့ ထွက်ပြေးသွားသည့် စစ်သား ၄၀၀မှ တချို့အား စစ်ကောင်စီက ပြန်ခေါ်ဆောင်ပြီး ရှေ့တန်းတွင် တာဝန်ထမ်းဆောင်စေလျက်ရှိသည်။