တနင်္သာရီတိုင်းမှာလည်း တိုက်ပွဲတွေ ပိုမိုပြင်းထန်လျက်ရှိ

တနင်္သာရီတိုင်း၊ ပုလောမြို့ပေါ်က စစ်ဖက်ရေးရာလုံခြုံရေးတပ်ဖွဲ့ (စရဖ) ရုံးကို မြိတ်ခရိုင်အမှတ်-၁ တပ်ရင်းက ဝင်ရောက်စီးနင်းကြောင်း ဇန်နဝါရီလ ၇ ရက်နေ့မှာ သတင်းထုတ်ပြန်ထားပါတယ်။ ဇန်နဝါရီလ ၆ ရက် ည ၁၁ နာရီ ၁၀ မိနစ်အချိန်အတွင်း စီးနင်းချိန်မှာ စစ်ကောင်စီတပ်ဖွဲ့ဝင်များထွက်ပြေးသွားကြောင်း မြိတ်ခရိုင်အမှတ်-၁ တပ်ရင်းက ပြောပါတယ်။ “စစဝင်ချင်း ကျွန်တော်တို့ တပ်ဖွဲ့ဝင်တွေကနေ RPG နဲ့ စတင်ပစ်ခတ်ချိန်မှာ စရဖရုံးမှာ လုံခြုံရေးယူထားတဲ့ စစ်ကောင်စီတပ်သားတွေဟာ သေနတ် ခြောက်ချက်လောက်ပဲ ပစ်ဖောက်ပြီးတော့ ထွက်ပြေးသွားပါတယ်” လို့ သူက ပြောပါတယ်။ (စရဖ) ရုံးအား ဝင်ရောက်ရှာဖွေရာ သေနတ်ကျည်ဘောက် နှစ်ခု ၊ ကျည်အတာင့်၁၀၀ နှင့် စာရွက်စာတမ်းများ သိမ်းဆည်းရမိပြီနောက် အဆောက်အဦးအား မီးရှို့ဖျက်ဆီးခဲ့ကြောင်း တော်လှန်ရေးတပ်ဖွဲ့ထံမှ သိရပါတယ်။ ပုလောမြို့ စစ်ဖက်ရေးရာလုံခြုံရေးတပ်ဖွဲ့ရုံးဟာ ပုလောမြို့ အမှတ် (၂) ရပ်ကွက် တွင် မြို့တော်ခန်းမနှင့်ကပ်လျက်တည်ရှိပြီး စရဖ ရုံးတွင် စစ်ကောင်စီတပ်ဖွဲ့ ဝင် လေးဦး နှင့် မြို့တော်ခန်းမတွင် စစ်ကောင်စီတပ်ဖွဲ့ ဝင် သုံးဦးသာရှိတယ်လို့ မြိတ်ခရိုင်အမှတ်-၁ တပ်ရင်းက တာဝန်ခံ ကိုအာနိုးက ပြောပြပါတယ်။ တပ်ဖွဲ့ဝင်များ ထိခိုက်မှုတစုံတရာမရှိခဲ့ပါဘူး။ နောက်ထပ် တနင်္ဿာရီတိုင်းတွင်း တိုက်ပွဲကတော့ ထားဝယ်မြို့နယ် မဲချောင်းစခန်းကုန်းနဲ့ စစ်ဆေးရေးဂိတ်ကို တော်လှန်ရေးတပ်များ ဝင်တိုက်တာဖြစ်ပါတယ်။ ရန်သူ စစ်ကောင်စီ ၅ ဦးကို ချေမှုန်းနိုင်ပြီး တော်လှန်ရေးရဲဘော် ၃ ဦးကျဆုံးသွားပါတယ်။ မဲချောင်း(ရှစ်မိုင်)စခန်းကုန်းနဲ့ စစ်ဆေးရေးဂိတ်ကို ဇန်နဝါရီ ၂ ရက် နေ့လည်ပိုင်းက တော်လှန်ရေးပူးပေါင်းတပ်တွေ သွားရောက်တိုက်ခိုက်ခဲ့တာ ဖြစ်ကြောင်း (ရေဖြူ) YePhyu People Defence Force ထံက သိရပါတယ်။ တိုက်ခိုက်မှုဟာ ၁ နာရီခန့်ကြာမြင့်ခဲ့ပါတယ်။ စစ်ကောင်စီတပ်ရဲ့ စစ်ဆေးရေးဂိတ်ကို သိမ်းပိုက်နိုင်ခဲ့ကာ အကြမ်းဖက်စစ်သား ၅ ယောက်သေပြီး MA ကျည်ဘောက် ၄ ခု၊ လက်ကိုင်ဖုန်း ၂ လုံး၊ စကားပြောစက် ၃ လုံး၊ ကျည် ၂၆၅ တောင့်နဲ့ အီကွေးမန့် ၁ စုံကို သိမ်းဆည်းနိုင်ခဲ့ပါတယ်။ အခုတိုက်ပွဲကို ဒူကရစစ်ကြောင်းက ဦးဆောင်ပြီး ဓဝယ်အမျိုးသားလွတ်မြောက်ရေးတပ်တော်(DNLA)၊ ရေဖြူပြည်သူ့ကာကွယ်ရေးတပ်ဖွဲ့ (YPPDF)၊ ဖက်ဒရယ်ဓူဝံကြယ်ဒရုန်းတပ်ဖွဲ့နဲ့ D.E.F-PDF ဒရုန်းတပ်ဖွဲ့တို့ ပူးပေါင်းတိုက်ခိုက်ခဲ့ကြတာဖြစ်ပြီး ပြည်သူ့တော်လှန်ရေးအတွက်တော့ တော်လှန်ရေးရဲဘော် ၃ ယောက် ကျဆုံးပေးဆပ်ခဲ့ရတယ်လို့ သိရပါတယ်။