စီသရီးတောင်စခန်း (ပွိုင့် ၃စခန်း) ကို ချင်းပြည်ကောင်စီပူးပေါင်းတပ် သိမ်းပိုက်၊ လက်နက်ခဲယမ်းများရရှိ

ချင်းပြည်နယ် ဟားခါးမြို့နဲ့ ထန်တလန်မြို့ကြားရှိ စီသရီးတောင်စခန်း(ပွိုင့်-၃စခန်း) ကို နိုဝင်ဘာ ၂၆ရက်မှာ ချင်းပြည်ကောင်စီပူးပေါင်းတပ်တွေက သိမ်းယူလိုက်ပြီလို့ သိရပါတယ်။ဟားခါးမြို့နဲ့ ထန်တလန်မြို့အကြားရှိစခန်းတွေကို အောက်တိုဘာလထဲမှာ စစ်ကောင်စီတပ်က ထိုးစစ်ဆင်လာပြီး ပြန်လည်ရယူခဲ့ရာက နို၀င်ဘာ ၂၂ရက်နေ့မှစတင်ကာ အဆိုပါစခန်းတွေကို ချင်းပြည်အစိုးရ ပူးပေါင်းတပ်ဖွဲ့တွေက ပြန်လည်ထိုးစစ်ဆင်တိုက်ခိုက်တာဖြစ်တယ်လို့ The Chin Journal က ဖော်ပြပါတယ်။

သိမ်းပိုက်ရရှိတဲ့ ပွိုင့် ၃စခန်းကနေ စက်သေနတ် ၁လက်အပါအဝင် သေနတ် ၆လက်နဲ့ ခဲယမ်းတချို့ကို သိမ်းဆည်းရမိခဲ့တယ်လို့ သိရပါတယ်။ဟားခါးမြို့အနီး Rual-U သုသာန်၀န်းကျင်နဲ့ ဟားခါး-ထန်တလန်အကြားမှာ နို၀င်ဘာ ၂၂ရက်နေ့မှစတင်ကာ ချင်းပြည်အစိုးရ ပူးပေါင်းတပ်ဖွဲ့နဲ့ စစ်ကောင်စီတပ်ဖွဲ့အကြားတိုက်ပွဲပြင်းထန်ခဲ့ပြီး မနေ့က နို၀င်ဘာ ၂၆ရက်နေ့အထိ စစ်ကောင်စီဖက်မှ လေကြောင်းတိုက်ခိုက်မှုအပြင် ဟားခါးမြို့ ၂၆၆ တပ်စခန်းမှလက်နက်ကြီးများဖြင့် အပြင်းအထန်ခုခံတိုက်ခိုက်နေတယ်လို့ သိရပါတယ်။ထန်တလန်မြို့သိမ်းတိုက်ပွဲကို ပြီးခဲ့တဲ့ ဇူလိုင်လလယ်မှစတင်ဆင်နွှဲခဲ့ရာ ဟားခါး-ထန်တလန်ကြားရှိ စစ်ကောင်စီစခန်းများကိုသိမ်းပိုက်ထားနိုင်ခဲ့ရာ စစ်ကောင်စီဘက်က ဟားခါးကနေ စစ်ကူအင်အားအလုံးအရင်းနဲ့ ပြန်လည်တိုက်ခိုက်နေတာဖြစ်ပါတယ်။

လက်ရှိမှာ ချင်းပြည်နယ်အတွင်း၊ မင်းတပ်မြို့နဲ့ ဖလမ်းမြို့သိမ်းတိုက်ပွဲများ ကို ချင်းကာကွယ်ရေးတပ်ဖွဲ့(မင်းတပ်)နဲ့ မဟာမိတ်တပ်ပေါင်းစုများက နိုဝင်ဘာ ၈ ရက်နေ့မှ စတင်ကာ မြို့သိမ်းတိုက်ပွဲဆင်နွှဲနေပြီး မင်းတပ်မြို့ရဲ့ ၆၀ ရာခိုင်နှုန်းခန့်ကို ထိန်းချုပ်နိုင်ပြီလို့ သိရပါတယ်။