လက်ဖက်ရည်ဆိုင်ထိုင်နေတဲ့ စစ်ကောင်စီရဲတွေကို တော်လှန်ရေးတပ်တွေဝင်ပစ်ပြီး သေနတ်သိမ်းနိုင်ခဲ့ကြပါတယ်

ဆီမီးခုံမြို့ရှိ ကောင်းမြတ်အောင် လက်ဖက်ရည်ဆိုင်တွင်း ရဲများရောက်နေစဉ် တော်လှန်ရေးတပ်တွေက ဝင်ရောက်ရှင်းလင်းရာ ငါးမိနစ်ခန့်သာ ကြာခဲ့ပါတယ်။ ဖြစ်စဉ်က နိုဝင်ဘာလ ၂၁ ရက်နေ့ မွန်းလွဲ ၁၂ နာရီခွဲမှာဖြစ်ခဲ့တာပါ။မန္တလေးတိုင်း မြင်းခြံမြို့နယ် ဆီမီးခုံမြို့၊ ရွှေစည်းခုံဘုရား အရှေ့ဘက်ရှိ ကောင်းမြတ်အောင် လက်ဖက်ရည်ဆိုင်အတွင်း ရဲ ၃ ဦးကို မိုင်းဇာနည်ပြောက်ကျားတပ်ဖွဲ့၊ MP-9 အဖွဲ့၊ တလုပ်-PDF နှင့် ရွှေဂျိုးဖြူ-ပြည်သူ့ကာကွယ်ရေးတပ်ဖွဲ့ (မြင်းခြံ) အဖွဲ့တို့က ပူးပေါင်းတိုက်ခိုက်ခဲ့ပါတယ်။

တိုက်ခိုက်မှုမှာ နယ်ထိန်းရဲ ၁ ဦး၊ ရဲတပ်သား ၁ ဦး သေပြီး နောက်တဦး ပြင်းထန်ဒဏ်ရာရသွားတယ်လို့ သိရပါတယ်။ သိမ်းပိုက်နိုင်ခဲ့တဲ့ လက်နက်တွေကတော့ G-3 သုံးလက်ဖြစ်ပါသည်။ “ လက်ဖက်ရည်ဆိုင်အတွင်းမှာ ပစ်ခတ်မှုဖြစ်ခဲ့တာပါ။ ရဲတပ်သားတွေ သေနတ်ကို ကိုင်ချိန်မရလိုက်ဘူး ဖြစ်သွားတယ်” လို့ MP9 တပ်ဖွဲ့ တာဝန်ရှိသူက ပြောပါတယ်။ ပစ်ခတ်မှုဖြစ်ပွားခဲ့တဲ့ လက်ဖက်ရည်ဆိုင်ဟာ ရဲစခန်းနဲ့ မီတာ ၂၀၀ ပဲဝေးတယ်လို့ သိရပါတယ်။ဒါ့အပြင် ဆီမီးခုံမြို့ပေါ်မှာ ရန်သူစစ်ကောင်စီတပ်များဟာ ရဲစခန်း၊ ဆေးရုံနှင့် ရေနက်ဆိပ်ကမ်းစတဲ့နေရာတွေမှာ အင်အား ၁၀၀ ခန့်ဖြင့် အထိုင်ချတပ်စွဲထားတဲ့ကြားမှာပဲ ခုလိုပစ်ခတ် သေနတ်သိမ်းယူနိုင်ခဲ့တာလည်း ဖြစ်ပါသည်။