Passport သက်တမ်းကုန်နေတဲ့ တောင်ကိုရီးယားရောက် မြန်မာများ NUG ကိုယ်စားလှယ်ရုံးမှာ သက်တမ်းတိုးနိုင်ပြီ

တောင်ကိုရီးယားနိုင်ငံမှာ ရောက်ရှိနေပြီး နိုင်ငံကူးလက်မှတ်-Passport သက်တမ်းကုန်နေတဲ့ မြန်မာနိုင်ငံသားများဟာ အမျိုးသားညီညွတ်ရေးအစိုးရ-NUG တောင်ကိုရီးယားနိုင်ငံကိုယ်စားလှယ်ရုံးမှာ သက်တမ်းတိုးနိုင်ပြီလို့ သိရပါတယ်။NUG ကိုယ်စားလှယ်ရုံးမှာ နိုင်ငံကူးလက်မှတ် သက် တမ်းတိုးပြီးနောက် တောင်ကိုရီးယားအစိုးရ လူဝင်မှုကြီးကြပ်ရေးကလည်း လက်ခံဆောင်ရွက်ပေးကာ စစ်ကောင်စီသံရုံးမှာ သက်တမ်းတိုးစရာမလိုဘဲ သက်တမ်း ၂ နှစ်ရရှိမယ်လို့ သိရပါတယ်။”ဟုတ်ပါတယ် NUG ရုံးမှာ သက်တမ်းတိုးပေးနေပါတယ်။ တခြားထွက်လို့တော့မရသေးဘူး ကိုရီးယားအစိုးရက ဒီပြည်တွင်းထဲ နေလို့ရအောင် နားလည်မှုနဲ့ လုပ်ပေးတယ်လို့ ထင်ပါတယ်။ “လို့ တောင်ကိုရီးယားရောက် မြန်မာတစ်ဦးက VOR ကို ပြောပါတယ်။

စစ်ကောင်စီဟာ ပြည်ပရောက်မြန်မာတွေဆီက နည်းမျိုးစုံနဲ့ လုပ်ခလစာများကို မတရားအခွန်အခကောက်ခံလျက်ရှိရာ တောင်ကိုရီးယားရောက်မြန်မာများအနေနဲ့ စစ်ကောင်စီသံရုံးမှာ အခွန်ဆောင်စရာမလိုဘဲ နိုင်ငံကူးလက်မှတ်သက်တမ်းတိုးနိုင်ပြီဖြစ်ပါတယ်။”ကောင်းပါတယ် ဝမ်းသာစရာတစ်ခုပါပဲ။ အဆင်ပြေသွားတာပေါ့။”လို့ တောင်ကိုရီးယားရောက် မြန်မာတစ်ဦးက ဆက်လက်ပြောပါတယ်။နိုင်ငံရေး၊ စစ်ရေးရှုံးနိမ့်နေတဲ့ စစ်ကောင်စီဟာ ဘဏ္ဏာရေးမှာလဲ နိုင်ငံတကာရဲ့ အရေးယူပိတ်ဆို့မှုတွေကြောင့် မြန်မာနိုင်ငံမှာ နိုင်ငံခြားငွေ လိုအပ်ချက်အမြင့်ဆုံးရောက်ရှိနေပြီး ပြည်ပရောက်မြန်မာတွေဆီက အခွန်တိုးမြှင့်ကောက်ခံလျက်ရှိပါတယ်။ပြည်ပရောက်မြန်မာတွေအနေဲ့ စစ်ကောင်စီထံ အခွန်မဆောင်ကြဖို့ မြန်မာ့ဒီမိုကရေစီအရေးလှုပ်ရှားသူတွေက တိုက်တွန်းမှုတွေ လုပ်ဆောင်ခဲ့ပေမယ့်လည်း ပြည်ပရောက်မြန်မာတွေ နေထိုင်ဖို့အတွက် ဖိအားအခက်အခဲတွေ ရှိနေခဲ့ရာ တောင်ကိုရီးယာနိုင်ငံအနေနဲ့ ပထမဆုံး ပြည်သူ့အစိုးရထံ သက်တမ်းတိုးနိုင်လာတာဖြစ်ပါတယ်။