အမ်းမြို့ တိုင်းစစ်ဌာနချုပ်ကို ရခိုင့်တပ်တော်က ပစ်မှတ်ထားနေချိန်မှာ စစ်ကောင်စီရဲ့ ထောက်ပို့လမ်း စစ်စခန်းတွေကို တော်လှန်တပ်တွေက သိမ်းပိုက်နေပါတယ်

မကွေးတိုင်း၊မင်းဘူးခရိုင်၊အမ်း- ပဒါန်းလမ်းမပေါ်တွင် လုံခြုံရေးယူထားသော စစ်‌ကောင်စီစခန်းနှစ်ခုကို ပူးပေါင်းတော်လှန်ရေးတပ်တွေ စီးနင်းတိုက်ခိုက်ခဲ့ကြကြောင်း နိုဝင်ဘာလ ၆ ရက်၊ ဒီနေ့ရက်စွဲနဲ့ ထုတ်ပြန်ထားပါတယ်။ လူထုတော်လှန်ရေးမဟာမိတ်အင်အားစု (PRA – Magway) က ထုတ်ပြန်တာဖြစ်ပြီး နိုဝင်ဘာလ ၅ရက် နံနက် ၁၁နာရီ ၅မိနစ် အချိန်တွင်စီးနင်းနိုင်ခဲ့တာ ဖြစ်တယ်လို့ ဆိုထားပါတယ်။ တိုက်ပွဲအတွင်း ရန်သူ့စစ်ကောင်စီတပ်ဖွဲ့ဝင် ၁၀ဦးခန့်သေဆုံးနိုင်တယ်လို့ ဖော်ပြပါရှိပါတယ်။ တိုက်ခိုက်စီးနင်းခံရတဲ့ စခန်းဟာ အမ်း- ပဒါန်းလမ်းမပေါ်ရှိ ဂုတ်ကြီးကျေးရွာထိပ်၊ဘုံဘောလမ်းဆုံနှင့် မိုင်တိုင်(၁၁)ဖြစ်ပြီး ရန်သူအင်အား ၃၅ဦးခန့်ရှိသော စခန်းဖြစ်ပါတယ်။

“တိုက်ပွဲအတွင်းမှာ စစ်ကောင်စီဘက်က ခြောက်ယောက်လောက်သေသွားတာကို မျက်မြင်တွေ့ရကြောင်း၊ အလောင်းတွေသယ်ထုတ်သွားတဲ့အခြေအနေတွေကိုကြည့်ပြီး ၁၀ဦးခန့်သေဆုံးနိုင်တယ်လို့ အတည်ပြုခဲ့တာဖြစ်ကြောင်း ” PRA – Magway စစ်ဦးစီး ချုပ် နောင်သူရိန်က ပြောပါတယ်။ အဲ့လိုအနိုင်ယူပြီးနောက် နယ်မြေရှင်းလင်းဖို့လုပ်နေစဉ်မှာပဲ စစ်ကောင်စီရဲ့ နတ်ရေကန်စခန်းမှ ဟောင်ဝစ်ဇာများပစ်တဲ့အပြင် မြေပြင်စစ်ကူတွေရောက်လာလို့ ဆုတ်ခွါခဲ့ကြကြောင်း ဆိုပါတယ်။ တိုက်ပွဲဖြစ်ခဲ့တဲ့ နယ်မြေ အမ်း – ပဒါန်းလမ်းသည် အမ်းမြို့နယ်အနောက်ပိုင်းတိုင်းစစ်ဌာနချုပ်(နပခ)အတွက် စစ်ကောင်စီက လက်နက်၊ရိက္ခာထောက်ပို့အဖြစ်အဓိကအသုံးပြုသည့်လမ်းပိုင်းတခုဖြစ်ပြီး အခုချိန်မှာတော့ တော်လှန်တပ်တွေက ပိတ်ဆို့ ဖြတ်တောက်တာ ခံနေရပါတယ်။ ပြီးခဲ့တဲ့ အောက်တိုဘာလ ၂၈ရက်နေ့ကလည်း အန်း – ပဒါန်းလမ်းမပေါ် တိုက်ပွဲတွေ ဖြစ်ခဲ့ပါသေးတယ်။ အမ်းမြို့နယ်ဖက်မှ ရိက္ခာပို့ပြီးပြန်လာသော စစ်ကောင်စီယာဥ်တန်းကို မင်းဘူးခရိုင်အမှတ်(၂) တပ်ရင်းနှင့် မဟာမိတ်တပ်တွေ ဝိုင်းတိုက်ခဲ့တာဖြစ်ပြီး ရန်သူ ၁၀ ဦးခန့်သေဆုံးသွားခဲ့ပါသေးတယ်။ အခုနောက်ဆုံးတိုက်ပွဲကိုတော့ PRA – Magway နှင့်အတူအရှိုချင်းကာကွယ်ရေးတပ်(ACDF)နှင့် မင်းဘူးခရိုင်အမှတ်(၂) တပ်ရင်းတို့ ပူးပေါင်း တိုက်ခိုက်ခဲ့တာ ဖြစ်ပါတယ်။ ရခိုင့်တပ်တော်ရဲ့ ရခိုင်ပြည်အတွင်း တိုင်းစစ်ဌာနချုပ်ကို အောင်မြင်တဲ့အခါ ပြည်သူ့ကာကွယ်ရေးတပ်များရှိရာ စစ်ရေးနယ်မြေတွေမှာလည်း ပိုပြီးတော်လှန်ရေးအားကောင်းဖို့ စိတ်အားထက်သန်လျက်ရှိကြပါသည်။