သင်္ဃန်းညီနောင်သို့ တပ်ချိန်းရန်လာသည့် စစ်ရဟတ်ယာဉ် ၂စီးကို ပစ်ခတ်ရာ တမခ ၄၄ တပ်မမှူး ဒဏ်ရာအပြင်းအထန်ရရှိ

ဇန်နဝါရီ ၂၉၊ VOR

ကရင်ပြည်နယ်၊ မြ၀တီမြို့နယ်၊ သင်္ဃန်းညီနောင် ခမရ ၃၅၅ တပ်သို့ တပ်ချိန်းရန်လာသည့် စစ်ရဟတ်ယာဉ် ၂ စီးကို KNLA ဦးဆောင်သော တော်လှန်ရေးတပ်များက ၀ိုင်းဝန်းပစ်ခတ်ရာ ရဟတ်ယာဉ် တစ်စီး ထိမှန်ပျက်စီးသွားကြောင်း သိရသည်။

ပျက်စီးသွားသည့် စစ်ရဟတ်ယာဉ်တွင် တမခ ၄၄ တပ်မမှူး ဗိုလ်မှူးချုပ်အေးမင်းနောင်နှင့် Pilot ၂ ဦး၊Drone အရာရှိ ၁ ဦးအပါအဝင် စုစုပေါင်း ၆ ဦး အပြင်းအထန်ဒဏ်ရာရရှိထားသည်ဟု ကနဦးသိရသည်။

ယနေ့ ဇန်နဝါရီလ ၂၉ ရက်နေ့ မွန်းလွဲ ၂ နာရီ ကျော်အချိန် သင်္ဃန်းညီနောင် ခမရ ၃၅၅ တပ်ရင်းထဲသို့ တပ်ချိန်းရန် လာရောက်စဉ် KNLA တပ်များနှင့် တော်လှန်ရေးတပ်များက ၀ိုင်းဝန်း ပစ်ခတ်ခြင်းဖြစ်ကြောင်း သိရသည်။

သင်္ဃန်းညီနောင် ခမရ ၃၅၅ တပ်ရင်းထဲသို့ စစ်ရဟတ်ယာဉ် ၂ စီးလာရောက်ခဲ့ခြင်းဖြစ်ပြီး ရဟတ်ယာဉ် တစ်စီးမှာ ကျည်ထိမှန် ပျက်စီးသွားကာ ခမရ ၃၅၅ တပ်ရင်းထဲတွင် ရပ်တန့်ထားကြောင်း၊ အခြားစစ်ရဟတ်ယာဉ်မှာ ပြန်လည် ထွက်ခွာသွားကြောင်း သိရသည်။

အဆိုပါပစ်ခတ်မှုကြောင့် စစ်ရဟတ်ယာဉ်ပေါ်တွင် လိုက်ပါသော တပ်မ ၄၄ တပ်မမှူး ဗိုလ်မှူးချုပ်အေးမင်းနောင်မှာ ဒဏ်ရာ အပြင်းအထန်ဒဏ်ရာရရှိထားပြီး စစ်တပ်က ကယ်ဆယ်ရေးလုပ်နေကြောင်း သိရသည်။