အကျဉ်းကျခံနေရသည့် ၃ထောင်ကျော် ကို စစ်ကောင်စီပြန်လွှတ်

ဧပြီ ၁၇၊ VOR

ယနေ့ မြန်မာနှစ်ဆန်းတစ်ရက်နေ့တွင် အကျဉ်းထောင်အသီးသီး၌ အကျဉ်းကျခံနေရသည့် ၃၃၀၃ဦးကို လွတ်ငြိမ်းချမ်းသာခွင့်ပေးလိုက်ကြောင်း စစ်ကောင်စီက ကြေညာသည်။

ယနေ့ ဧပြီလ ၁၇ရက် မြန်မာနှစ်သစ်ကူးအခါသမယတွင် အကျဉ်းထောင်/အချုပ်ထောင်/ စခန်းအသီးသီးတွင် ပြစ်ဒဏ်ကျခံလျက်ရှိသည့် အကျဉ်သား/အကျဉ်းသူ ၃၃၀၃ဦးတို့ကို ရာဇဝတ်ကျင့်ထုံးဥပဒေပုဒ်မ ၄၀၁၊ ပုဒ်မခွဲ (၁) အရ “နောက်တစ်ကြိမ် ထပ်မံပြစ်မှုကျူးလွန်ပါက ၎င်းပစ်ဒဏ်အပြင် ယခုကျခံရန်ကျန်ရှိသော ပြစ်ဒဏ်များကိုပါ ဆက်လက်ကျခံပါမည်” ဟူသော စည်းကမ်းချက်ဖြင့် ပြစ်ဒဏ်လွတ်ငြိမ်းခွင့်ပေးခြင်းဖြစ်ကြောင်း သိရသည်။

နိုင်ငံရေးအကျဉ်းသား လွတ်မြောက်မှုအခြေအနေများကို VOR အနေဖြင့် မသိရှိရသေးပေ။

” နှစ်ဆန်းတစ်ရက်နေ့ ပေးသည့် အကြမ်းဖက်စစ်ကောင်စီ လွတ်ငြိမ်း အကျဉ်းသား၊အကျဉ်းသူအရေအတွက် အလွန်နည်းပါးသည်။ နိုင်ကျဉ်းအရေအတွက် မည်မျှပါဝင်ကြောင်း စောင့်ကြည့်ထုတ်ပြန်သွားပါမည်။” ဟု
မြန်မာနိုင်ငံလုံးဆိုင်ရာနိုင်ငံရေးအကျဉ်းသားများကွန်ရက်(PPNM)ကလည်း ထုတ်ပြန်ထားသည်။

ဖေဖော်ဝါရီလ ၁ ရက်၊ ၂၀၂၁ ခုနှစ် စစ်အာဏာသိမ်းမှု စတင်ချိန်မှ ဧပြီလ ၁၂ ရက်၊ ၂၀၂၄ ခုနှစ်အထိ စစ်အုပ်စုနှင့် ၎င်း၏လက်ပါးစေများကြောင့် ဖမ်းဆီးခံခဲ့ရသူ စုစုပေါင်း (၂၆၅၂၄) ဦးရှိပြီး ထိုအထဲမှ ပြည်သူ (၂၀၃၅၁) ဦးမှာ ထိန်းသိမ်းခံနေရဆဲဖြစ်ကာ ထိန်းသိမ်းခံနေရသူများအနက်မှ (၈၉၄၀) ဦးမှာ ထောင်ဒဏ်ချမှတ်ခံထားရသည်ဟု နိုင်ငံရေးအကျဉ်းသားများ‌စောင့်ရှောက်ရေအသင်း AAPP က ထုတ်ပြန်ထားသည် ။