ပလက်ဝမြို့တွင် စစ်တပ်က ထွက်ပြေးလာသော ဗိုလ်ကြီး ၁ဦးနှင့် ၁၅ဦးကို ချင်းဒေသကာကွယ်ရေးတပ်က ဖမ်းမိ

ချင်းပြည်နယ်၊ ပလက်ဝမြို့နယ်တွင် စစ်ကောင်စီတပ်မှ ထွက်ပြေးလာသော ဗိုလ်၁ဦးအပါအဝင် ၁၅ ဦးကို ချင်းဒေသကာကွယ်ရေးတပ် CDF – Daai က အရှင်ဖမ်းမိထားပြီး ဆေးကုသပေးနေကြောင်း CDF – Daai က ယနေ့ သတင်းထုတ်ပြန်သည်။

တပ်မ ၁၁ – ခမရ၂၁၇၊ ခမရ ၃၇၆၊ ခမရ ၅၃၈၊ ခမရ ၂၂၀၊ ခမရ ၂၁၉၊ ခမရ ၃၈ ၊ ခမရ ၅၈၇ နှင့် ခမရ ၉၀၈ တို့မှ ထွက်ပြေးလာ သုံးပွင့်ဗိုလ်ကြီးအဆင့် (၁) ဦး၊ နှစ်ပွင့် ဗိုလ်အဆင့် (၁) ဦးနှင့် ထောက်လှန်းရေးအရာရှိ (IO) တစ်ဦး အပါအဝင် အကြပ်ရဲဘော် စုစုပေါင်း (၁၅) ဦးကို ဇန်နဝါရီ ၃၀ ရက်နေ့တွင် CDF-Daai မှ ဒိုင်ရ်ဒေသအတွင်း၌ ဖမ်းဆီးခဲ့ခြင်းဖြစ်ကြောင်း သိရသည်။

ဖမ်းဆီးရမိသော အကြမ်းဖက်စစ်ကောင်စီတပ်သားများတွင် ပြင်းထန်ဒဏ်ရာ (၃) ဦးနှင့် သာမာန်ဒဏ်ရာ (၂) ဦး တို့ကို CDF – Daai မှ ဆေးကုသမှုများ ပြုလုပ်ပေးကာကောင်းမွန်စွာ ထိန်းသိမ်းထားပြီး နိုင်ငံတကာ စစ်ဖက်ဆိုင်ရာ ဥပဒေ Geneva Convention နှင့်အညီ ဆက်လက်ဆောင်ရွက်လျက်ရှိသည်ဟု ထုတ်ပြန်ချက်တွင် ဖော်ပြထားသည်။

CDF – Daai မှ ဒိုင်ရ်ဒေသအတွင်း နယ်မြေရှင်းလင်းရေးလုပ်ငန်းများ ဆက်လက်ဆောင်ရွက်သွားမည်ဖြစ်သဖြင့် ရေကြောင်းဖြင့်သွားလာခြင်းနှင့် ကုန်စည်ရောင်းဝယ်မှုများကို ဤသတင်းထုတ်ပြန်သည့် (၁.၂.၂၀၂၄) ရက်နေ့မှ ( ၄.၂.၂၀၂၄) ရက်နေ့အထိ လုံးဝ (လုံးဝ) မပြုလုပ်ကြပါရန် အသိပေး ထုတ်ပြန်ထားသည်။

ဇန်နဝါရီ ၂၉ရက်နေ့က ချင်းပြည် (Chinland)၊ ဒိုင်ရ်ဒေသ၊ ဟုမ်းကျေးရွာကို စစ်ကောင်စီမှ ဂျက်ဖိုက်တာ(၁)စီး ဗုံး (၅)လုံးဖြင့် သုံးကြိမ်တိုက်ခိုက်ခဲ့ရာ အရပ်သားပြည်သူ(၇)ဦး သေဆုံးပြီး (၃)ဦး ဒဏ်ရာ ရရှိခဲ့သဖြင့် ပြင်းထန်သည့်စစ်ရေး တုံ့ပြန်မှုများ ပြုလုပ်သွားမည်ဟု CDF – Daai က အသိပေးထားသည်။