စစ်ကောင်စီ တပ်ဖွဲ့ဝင် (၃)ဦး KNU ထံ လက်နက်အပ်နှံ အလင်းဝင်၊ ဆုငွေချီးမြှင့်ပြီး အလုပ်ကိုင် အခွင့်အလမ်းနှင့် နေစရာနေရာများစီစဉ်ပေးမည်

ဇန်နဝါရီ ၂၂၊ VOR

စစ်ကောင်စီတပ် (စကခ-၈)လက်အောက်ခံ တပ်ရင်းများဖြစ်သော အမှတ် (၄၁၀) ခြေမြန်တပ်ရင်း ဝင်းတာပန်တပ်စခန်းမှ တပ်သား (၂)ဦး၊ လေးကေတပ်စခန်းမှ တပ်သား (၁)ဦး သည် ကေအဲန်ယူ-ဒူးသထူခရိုင်ရှိ KNLA/KNDOနှင့် ပူးပေါင်း တော်လှန်ရေး တပ်ဖွဲ့ထံသို့ လက်နက် အပ်နှံကာ အလင်းဝင်ခဲ့သည်ဟု ကေအဲန်ယူ-ဗဟိုက သတင်းထုတ်ပြန်သည်။

ကေအဲန်ယူ-ဒူးသထူခရိုင် တာဝန်ရှိခေါင်းဆောင်များမှ ၎င်းတို့ (၃)ဦးအား လက်နက်အပ်နှံကာ အလင်းဝင်ရောက်လာသည့် အချိန်မှစ၍ လက်နက်ခဲယမ်းယူဆောင်လာသူများကို ထိုက်သင့်သည့် ဆုငွေ များ ပေးအပ်ချီးမြှင့်ခဲ့ပြီး ကောင်းမွန်စွာ ထိန်းသိမ်းစောင့်ရှောက်ထားသည်ဟု သိရသည်။

အာဏာသိမ်းစစ်ကောင်စီအား ပြန်လည် တော်လှန်လိုပါက ခွင့်ပြုပေးပြီး၊ မိမိနှင့် မိသားစုအရေးတွက်သာ လုပ်လိုပါက လိုအပ်သည့် အလုပ်ကိုင် အခွင့်အလမ်းနှင့် နေစရာနေရာများကို စီစဥ်ပေးသည်ဟု ကေအဲန်ယူ-ဒူးသထူခရိုင်၊ ခရိုင်ဥဣဌ-ပဒိုစောစိုးမြင့် မှပြောသည်။

အာဏာသိမ်းစစ်ကောင်စီတပ် (စကခ-၈)လက်အောက်ခံ (ခမရ-၄၁၀)တပ်ရင်း၊ စစ်ကောင်စီ လေးကေ တပ်စခန်းသည် ကေအဲန်ယူ-ဘီးလင်းမြို့နယ်၊ လေးကေရွာအလယ်တွင် တပ်စွဲထားကာ စစ်ကောင်စီ ဝင်းတာပန်တပ်စခန်းသည် ကေအဲန်ယူ-ဘီးလင်းမြို့နယ်၊ ဝင်းတာပန်ရွာဘေးတွင် တပ်စွဲထားသည်ဟု သိရသည်။