သပိတ်ကျင်းမြို့ ခရိုနီပိုင်ရွှေတွင်းတွေအနီးက တပ်စခန်း ၅ ခုကို မန္တလေး PDF သိမ်းပိုက်

ဩဂုတ် ၁၀၊ VOR

မန္တလေးတိုင်း၊ သပိတ်ကျင်းမြို့နယ်အတွင်း စစ်အုပ်စုနဲ့ ၎င်းတို့ဩဇာခံ ခရိုနီတွေပိုင်ဆိုင်တဲ့ ရွှေလုပ်ကွက်တွေရှိရာ အနီးက စစ်တပ်စခန်း ၅ခုကို ပြည်သူ့ကာကွယ်ရေးတပ်မတော် မန္တလေးက သိမ်းပိုက်လိုက်ပြီလို့ သိရပါတယ်။

သပိတ်ကျင်းမြို့အတွင်းက ကွင်း(၃၀)ရွာ တပ်စခန်း ၊ လက်ပံပြန့်ရွာ တပ်စခန်း ၊ ဖိုကုန်း တပ်စခန်း ၊ ဝက်သေရွာ တပ်စခန်း နှင့် ဖက်ရှည်ရွာ တပ်စခန်းတို့ကို အပြီးသတ်သိမ်းပိုက်ရရှိထားပြီးဖြစ်တယ်လို့ မန္တလေး PDF က သတင်းထုတ်ပြန်ထားပါတယ်။

အဆိုပါတပ်စခန်းတွေအနီးမှာ စစ်အုပ်စုအလိုတော်ရိခရိုနီတွေလုပ်ကိုင်လျက်ရှိတဲ့ ရွှေချိန် တန်နဲ့ချီတူးဖော်ထွက်ရှိရာ ရွှေလုပ်ကွက်နေရာတွေဖြစ်တယ်လို့ ဒေသတွင်းသတင်းအရင်းမြစ်တွေက ဖော်ပြပါတယ်။

တော်လှန်ရေးတပ်ဖွဲ့တွေဟာ မန္တလေးတိုင်းအတွင်းက ရွှေထွက်ရာမြို့တွေဖြစ်တဲ့ စဉ့်ကူး၊ သပိတ်ကျင်း၊ ပုသိမ်ကြီး၊ မတ္တရာမြို့တွေကို ထိုးဖောက်ဝင်ရောက်ထိန်းချုပ်နေပြီး ပုသိမ်ကြီးမြို့နယ်ထဲက စစ်ကောင်စီခန့် မန္တလေးတိုင်းဝန်ကြီးချုပ်ဟောင်း ဦးမောင်ကိုပိုင် ဖယောင်းတောင်ရွှေတွင်းဟာလဲ တော်လှန်ရေးတပ်ဖွဲ့တွေလက်ထဲရောက်ရှိလာပြီလို့ သိရပါတယ်။

ဒါ့အပြင် မန္တလေး-မိုးကုတ်ကားလမ်းပေါ်က ၁၄၈ ခြေလျှင်တပ်စခန်းကို မနေ့က ဩဂုတ်လ ၉ရက် ညနေ ၅နာရီမှာ TNLA နဲ့ မိုးကုတ်ဗျူဟာ အပါအဝင် မဟာမိတ်ပူးပေါင်းတပ်ဖွဲ့ဝင်များက တိုက်ခိုက်သိမ်းပိုက်နိုင်ခဲ့ပြီး လက်နက်ခဲယမ်းများသိမ်းဆည်းနိုင်ခဲ့တယ်လို့ မိုးကုတ်ဗျူဟာက ထုတ်ပြန်ထားပါတယ်။

လက်ရှိမှာ သပိတ်ကျင်းမြို့နယ်ကို သိမ်းပိုက်ဖို့ တပ်စခန်း ၃ခုသာကျန်ရှိပြီး တိုက်ပွဲတွေဟာ မြို့တော် မန္တလေးထိနီးကပ်လာနေပြီဖြစ်ပါတယ်။