Generation Z Army(GZတပ်တော်)က ရက္ခိုင်ပြည်၊ ကျောက်တော်မြို့ တိုက်ပွဲများအတွင်း ပါဝင်တိုက်ခိုက်ခဲ့ပြီး စစ်ပညာ အတွေ့အကြုံယူနိုင်ခဲ့

မတ် ၉၊ VOR

Generation Z Army(GZတပ်တော်)က ရက္ခိုင်ပြည်၊ ကျောက်တော်မြို့ တိုက်ပွဲများအတွင်း ပါဝင်တိုက်ခိုက်ခဲ့ပြီး စစ်ပညာသင်ယူခွင့်၊ တိုက်ပွဲအတွေ့အကြုံများကို ရယူနိုင်ခဲ့သဖြင့် ကျေးဇူးတင်ရှိကြောင်း ထုတ်ပြန်ပြောဆိုသည်။

ရက္ခိုင်ပြည်၊ကျောက်တော်မြို့နယ်၊ အပေါက်ဝကျေးရွာအနီးတွင်ရက္ခိုင့် တပ်တော်မှ စစ်ကောင်စီ၏ စစ်သင်္ဘော (၂) စီး နှင့် ဇက်သင်္ဘော (၁) စီးတို့အားသိမ်းပိုက်နိုင်ခဲ့ပြီး ကျောက်တော်မြို့အခြေစိုက် စစ်ကောင်စီ၏တပ်မဌာနချုပ် စကခ(၉)၊ ခမရ(၃၇၄)/(၃၇၅)/(၃၇၆)တို့အား ရက္ခိုင့်တပ်တော်မှအပြီးသတ်သိမ်းပိုက်နိုင်ခဲ့သည့် စစ်ရေးအောင်မြင်မှု၊ ထိုးစစ်များ နှင့် ကမ္ဘာသိသတင်းများအတွင်းတွင် Generation Z Army(GZတပ်တော်)မှ စစ်ပညာသင်ယူခွင့်၊ တိုက်ပွဲအတွေ့အကြုံများကို ရယူနိုင်ခဲ့သည်မှာ သေးငယ်သော အဖွဲ့အစည်းများအတွက် တန်ဖိုးဖြတ်မရသည့် အတွေ့အကြုံဖြစ်ခဲ့ကြောင်း ထုတ်ပြန်ချက်တွင် ဖော်ပြထားသည်။

ဤကဲ့သို့ အတွေ့အကြုံရရှိစေရန် အခွင့်အရေးပေးခဲ့သော အဖွဲ့အစည်းကို ကျေးဇူးတင်ရှိကြောင်းနှင့် ရရှိခဲ့သောတိုက်ပွဲ၊ တော်လှန်ရေးအတွေ့အကြုံများကို အဖွဲ့အစည်းအတွင်း လက်ဆင့်ကမ်းမျှဝေရင်း စစ်အာဏာရှင်စနစ်တိုက်ဖျက်ရေးလုပ်ငန်းများတွင် ပို၍ ပို၍ ပါဝင်ဆောင်ရွက်ပေးသွားမည်ဖြစ်ကြောင်း ထုတ်ပြန်ပြောဆိုထားသည်။