နမ့်ခမ်းတွင် PSLF/TNLA အမျိုးသမီးများအဖွဲ့မှ နိုင်ငံတကာအမျိုးသမီးများနေ့ အခမ်းအနား ကျင်းပပြုလုပ်၊PSLF/TNLA ဒုဥက္ကဋ္ဌ (၁) ဒုဗိုလ်ချုပ်ကြီး တားဂျုတ်ဂျားမှ အမှာစကားပြောကြား

မတ် ၉၊ VOR

တအာင်းပြည်နယ်၊ နမ့်ခမ်းမြို့တွင် PSLF/TNLA အမျိုးသမီးများအဖွဲ့မှ ဦးဆောင်ပြီး ယမန်နေ့ မတ်လ (၈)ရက်နေ့တွင် ကျရောက်သည့် နိုင်ငံတကာအမျိုးသမီးများနေ့ (International Women’s Day) အခမ်းအနားကို ကျင်းပပြုလုပ်ခဲ့ကြောင်း TNLA က သတင်းထုတ်ပြန်သည်။

အခမ်းအနားတွင် PSLF/TNLA ဒုဥက္ကဋ္ဌ (၁) ဒုတိယ ဗိုလ်ချုပ်ကြီး တားဂျုတ်ဂျား၊ PSLF/TNLA အရာရှိအရာခံများနှင့် နမ့်ခမ်းမြို့နယ် ပြည်သူများ တက်ရောက်ခဲ့ရာ PSLF/TNLA ဒုဥက္ကဋ္ဌ (၁) ဒုဗိုလ်ချုပ်ကြီး တားဂျုတ်ဂျားမှ အမှာစကားပြောကြားခဲ့ပြီး၊ အမျိုးသမီးကော်မတီ ဗိုလ်ကြီးယေကာနှင့် နမ့်ခမ်းမြို့နယ်ရဲမှူး ဗိုလ်နောရိူရ်းတို့လည်း တက်‌ရောက် အမှာစကားပြောကြားခဲ့သည်ဟု သိရသည်။။

နိုင်ငံတကာအမျိုးသမီးများနေ့ ဖြစ်ပေါ်လာပုံသမိုင်းကြောင်း၊ PSLF/TNLA အမျိုးသမီးဖွံ့ဖြိုးတိုးတက်ရေးဌာန၏ လုပ်ငန်းစဥ်နှင့် တအာင်းပြည်နယ်အတွင်း ဖြစ်ပွားခဲ့သော အမျိုးသမီးများအပေါ်အကြမ်းဖက်ခံရမှုများအကြောင်း ဆွေးနွေးတင်ပြခဲ့သည်ဟု သိရသည်။

နိုင်ငံတကာအမျိုးသမီးများနေ့မှာ အမျိုးသမီးများ နိုင်ငံတကာအမျိုးသမီးများနေ့အကြောင်း သိရှိရန်၊ အမျိုးသမီးအပေါ် အကြမ်းဖက်မှုများ လျှော့နည်းလာစေရန်၊ အမျိုးသမီးများ၏ အခွင့်အရေးနှင့် ရပိုင်ခွင့်များကို တောင်းဆိုတက်ပြီး အသုံးပြုတက်စေရန်နှင့် PSLF/TNLA အမျိုးသမီးဌာန၏ လုပ်ငန်းစဉ်များတွင် ပူပေါင်းပါဝင်လာစေရန်၊ ရပ်ရွာအတွင်း အကြမ်းဖက်ခံရသောအမျိုးသမီးများကို ရပ်ရွာအတွင်းရှိ အမျိုးသမီးအားလုံးဝိုင်းဝန်းကူညီနိုင်ရန်တို့ ဖြစ်သည်ဟု ဆိုသည်။

အဆိုပါ အခမ်းအနားကို PSLF/TNLA ဒုဥက္ကဋ္ဌ (၁) ဒုတိယ ဗိုလ်ချုပ်ကြီး တားဂျုတ်ဂျား အပါအဝင် အမျိုးသမီးအဖွဲ့ဝင်ခေါင်းဆောင်များ၊ ဌာနဆိုင်ရာ အသီးသီးမှ အရာရှိအရာခံများ နှင့် နမ့်ခမ်းမြို့နယ် ပြည်သူလူထုများ စုစုပေါင်း (၅၀၀)ကျော် တက်ရောက်ခဲ့ကြကြောင်း သိရသည်။