အကြမ်းဖက်တပ်က လိုင်ဇာသို့ပစ်ခတ်သော လက်နက်ကြီးကျည် တရုတ်ပြည်သို့ကျရောက်ပေါက်ကွဲ၊ နေအိမ် ၁လုံးမီးလောင်ပျက်စီး

မတ် ၈၊ VOR

ကချင်ပြည်နယ် လိုင်ဇာမြို့ ရှိ လူနေရပ်ကွက်အတွင်းသို့ ယနေ့ နံနက်အစောပိုင်းတွင် စစ်ကောင်စီတပ်က ပစ်လွှတ် လိုက်သော လက်နက်ကြီး အမြောက်ကျည်ဆံ (၂) လုံး သည် လိုင်ဇာမြို့ တွင်မကျဘဲ တရုတ်-ကချင် နယ်စပ် လိုင်ဇာမြို့(တဘက်ကမ်း)အနီး တရုတ်နိုင်ငံအတွင်းသို့ ကျရောက်ပေါက်ကွဲ ကာ လူနေအိမ် တစ်လုံး ထိခိုက်ကာ မီးလောင် ပျက်စီးသွားကြောင်း သိရသည်။

ယမန်နေ့ မတ်လ ၇ရက်မှစတင်ကာ ကချင်ပြည်နယ်အတွင်း ကချင်လွတ်လပ်ရေးတပ်မတော် KIA က ထိုးစစ်အရှိန်မြှင့်တင်ပြီး စစ်ကောင်စီ တပ်စခန်း ၁၂ခုကို တပြိုင်နက်ဝင်တိုက်ရာ စစ်ကောင်စီတပ် အထိနာပြီး လူနေရပ်ကွက်များအထိ လက်နက်ကြီး လေကြောင်းမှ ပစ်ခတ်နေခြင်းဖြစ်သည်။

စစ်ကောင်စီတပ်ရင်း များမှ လက်နက်ကြီးများပစ်ခတ်သည့်အပြင် လေကြောင်းမှ တစ်ရက်လုံးပစ်ခတ်တိုက်ခိုက်မှုများပြုလုပ်ခဲ့သည့်အတွက် KIO ဌာနချုပ်ရှိရာ လိုင်ဇာမြို့ ပြည်သူ့ဆေးရုံအနီးသို့ လက်နက်ကြီးထိမှန်ကျရောက်ခဲ့ပြီး လိုင်ဇာမြို့နှင့် ထိစပ်နေသည့် တရုတ် နယ်စပ်မြို့ဘက်သို့လည်း လက်နက်ကြီးအချို့ ကျရောက်ပေါက်ကွဲခဲ့သည်ဟု ညီနောင်မဟာမိတ် ၃ဖွဲ့က ထုတ်ပြန်ထားသည်။