ပေါင်းတည်မြို့နယ်တွင် စစ်ကောင်စီတပ်စစ်ကြောင်းကို မိုင်းဆွဲတိုက်ခိုက်ခဲ့ရာ စစ်သား ၃ ဦးသေဆုံး

မတ် ၄၊ VOR

ပဲခူးတိုင်း၊ ပေါင်းတည်မြို့နယ်တွင် စစ်ကောင်စီတပ်စစ်ကြောင်းကို ၂ ကြိမ် မိုင်းဆွဲတိုက်ခိုက်ခဲ့ရာ စစ်သား ၃ ဦးသေဆုံးပြီး ၃ ဦးထက်မနည်း ထိခိုက်ဒဏ်ရာရသွားကြောင်း ပြည်ခရိုင် ပြည်သူ့ကာကွယ်ရေးတပ်မတော်၊ ၃၆၀၁ – PPDF တပ်ရင်းက သတင်းထုတ်ပြန်သည်။

ပေါင်းတည်မြို့နယ်၊ ကျောက်တံခါးအုပ်စု၊ အလယ်ရွာနှင့် ရုပ်ဆိုင်ရွာအကြား သိမ်ကုန်းရွာ စစ်ကောင်စီတပ်အထိုင်စခန်းမှ ထွက်လာသည့် စစ်ကောင်စီတပ်သား ၂၃ ဦးပါ စစ်ကြောင်းကို မတ် ၃ ရက်နေ့ နံနက် ၈ နာရီခန့်အချိန်တွင် မိုင်း ၃ လုံးဆွဲတိုက်ခိုက်ရာ စစ်သား ၃ ဦးထက်မနည်း ထိခိုက်ဒဏ်ရာရရှိသွားကြောင်း သိရသည်။

ထို့အပြင် ဘန်းဘွေးကန်ရွာမှ အင်အားဖြည့်တင်းပြီး PDF စခန်းငယ်တစ်ခုကို ဝင်ရောက်စီးနင်းရန် ထွက်လာသည့် စစ်ကောင်စီတပ်ဖွဲ့ဝင် ၄၇ ဦးပါစစ်ကြောင်းမှ မတ်လ ၃ ရက်နေ့ နံနက် ၉ နာရီခွဲအချိန်တွင် PDF စခန်းငယ်အတွင်း ဝင်ရောက်စီးနင်းချိန် ထောင်ထားသည့် မိုင်းများကို ဖောက်ခွဲရာ မိုင်းဖောက်ခွဲမှုကြောင့် စစ်သား ၃ ဦး ပွဲချင်းပြီး သေဆုံးပြီး အများအပြား ဒဏ်ရာရရှိသွားကြောင်း သိရသည်။

စစ်ကောင်စီတပ်က စခန်းဝင်စီးနင်းမှာကို ပြည်သူ့ကာကွယ်ရေးတပ်ဖွဲ့များက သတင်းကြိုရပြီးနောက် လက်နက် အင်အားလူအင်အားမမျှတသဖြင့် စခန်းငယ်ကို စွန့်ခွာကာ စခန်းအတွင်း ပဒေသာမိုင်း ၄ လုံးထောင်ထားပြီး အဝေးထိန်းစနစ်ဖြင့် ဖောက်ခွဲတိုက်ခိုက်ခဲ့ကြောင်း သိရသည်။

အဆိုပါမိုင်းခွဲမှုကြောင့် အထိနာသွားသည့် စစ်ကောင်စီတပ်က PDF စခန်းငယ်ကို မီးရှို့ဖျက်ဆီးပြီး ရုပ်ဆိုင်ကျေးရွာ ဘုန်းကြီးကျောင်းအတွင်း ဝင်ရောက်သွားကြောင်း သိရသည်။

ယင်းတိုက်ခိုက်မှုများအတွင်း ပြည်သူ့ကာကွယ်ရေးရဲဘော်များ အထိအခိုက် အကျအဆုံး မရှိဘဲ ပြန်လည်ဆုတ်ခွာနိုင်ခဲ့ကြောင်း သိရသည်။