” ဗိုလ်ချုပ်အောင်ဆန်း၏ ၁၀၉နှစ်မြောက်မွေးနေ့”အထိမ်းအမှတ် စစ်တုရင်အားကစားပြိုင်ပွဲပြုလုပ်

ဖေဖော်ဝါရီ ၁၃၊ VOR

မြန်မာနိုင်ငံ၏လွတ်လပ်ရေးဖခင်ကြီး ဗိုလ်ချုပ်အောင်ဆန်း၏ ၁၀၉နှစ်မြောက်မွေးနေ့အထိမ်းအမှတ်အဖြစ် စစ်တုရင်အားကစားပြိုင်ပွဲကို ထိုင်းနိုင်ငံမဲဆောက်မြို့ တစ်နေရာတွင် ကျင်းပခဲ့ကြသည်။

“ဗိုလ်ချုပ်မွေးနေ့ကို အမှတ်ရနေစေဖို့ရယ် မဲဆောက်မြို့ကို အကြောင်းအမျိုးမျိုးကြောင့်ရောက်လာတဲ့ တော်လှန်ရေးဘက်တော်သားတွေအချင်းချင်း စည်းလုံးညီညွတ်စေချင်တဲ့ရည်ရွယ်ချက်တွေနဲ့ ပြုလုပ်တာဖြစ်ပါတယ်”ဟု ပွဲတာဝန်ရှိသူ ကို L.Zaw Aung က VOR ကိုပြောသည်။

တော်လှန်ရေးကြောင့် ရောက်ရှိလာသည့် နိုင်ငံကိုယ်စားပြုစစ်တုရင်အားကစားသမားများနှင့် စီးပွားရေးလုပ်ငန်းရှင်များလည်း ပါဝင်ကစားခဲ့ကြကြောင်း သိရသည်။

“ကျွန်တော်တို့က ရှုံးတာနိုင်တာအဓိကမထားဘဲ အားကစားစိတ်ဓာတ်နဲ့ပဲ ဗိုလ်ချုပ်မွေးနေ့ကို လာရောက်ဂုဏ်ပြုကစားတာပါ”ဟု ၂၀၁၇ခုနှစ်အာဆီယံ ဆီးဂိမ်းပြိုင်ပွဲတွင် အသက် ၂၀အောက် ဝင်ရောက်ယှဉ်ပြိုင်ခဲ့သူ ကိုကောင်းမြတ်သူက VOR ကိုပြောသည်။

အဆိုပါပွဲကို ဖေဖော်ဝါရီ ၁၁ရက်နေ့မှ ၁၃ရက်နေ့ထိ ၃ရက်တာ ကျင်းပမည်ဖြစ်ပြီး ဆုကြေးငွေချီးမြှင့်မှုများလည်းပါဝင်ကြောင်း သိရသည်။