ကန့်ဘလူနယ်တွင် စစ်ကောင်စီတပ်က စစ်ကြောင်းထိုးသောင်းကျန်းနေ၊ ရှမ်းတပ်ကျေးရွာမှ စိတ်ကျန်းမာရေးမကောင်းသည့် ပြည်သူတစ်ဦးအား မီးရှို့သတ်ဖြတ်ပြီး၊ ပြည်သူတစ်ဦးအားလူသားဒိုင်းအဖြစ် ဖမ်းဆီးသွား

ဖေဖော်ဝါရီ ၄၊ VOR

ကန့်ဘလူမြို့နယ် ရှမ်းတပ်ကျေးရွာမှ စိတ်ကျန်းမာရေးမကောင်းသည့် ပြည်သူတဦးအား မီးရှို့သတ်ဖြတ်ပြီး၊ ပြည်သူတစ်ဦးအား လူသားဒိုင်းအဖြစ်ဖမ်းဆီးသွားကာ ကန့်ဘလူနယ်အတွင်း စစ်ကြောင်းထိုးကာ ပြည်သူနေအိမ်များကို မီးရှို့ဖျက်ဆီးမှုကြောင့် နေအိမ် ၁၂လုံးမီးလောင်သွားခဲ့ကြောင်း ကျွန်းလှ ကန့်ဘလူတက်ကြွလှုပ်ရှားသူများအဖွဲ့(ကန့်ဘလူခရိုင်)ထံက သိရသည်။

ဖေဖော်ဝါရီ ၁ရက်နေ့နံနက် ၆ နာရီတွင် ကန့်ဘလူမြို့နယ်၊ ဇီးကုန်းသကြားစက်မှထွက်လာသောအကြမ်းဖက်စစ်ကောင်စီတပ်နှင့်ပျူစောထီးအင်အား ၁၀၀ ကျော်သည် ထန်းကုန်းတိုက်နယ်အတွင်းရှိ ရှမ်းတပ်ကျေးရွာသို့ စစ်ကြောင်းထိုးဝင်ရောက်ခဲ့ပြီး နှစ်ညအိပ်တပ်စွဲကာ စိတ်ကျန်းရေးမကောင်းသည့် အမျိုးသားတဦးအား နေအိမ်ထဲထည့်၍ မီးရှို့သတ်ဖြတ်ခဲ့‌ကြောင်း သိရသည်။

အဆိုပါအမျိုးသားသည်အသက်(၄၉)နှစ်ဝန်းကျင်ရှိ ကိုကြည်မြင့်ဆိုသူဖြစ်ပြီး ဖေဖော်ဝါရီလ ၃ ရက်နေ့မနက် ၆ နာရီဝန်းကျင်ခန့်တွင် အိမ်တစ်အိမ်ထဲထည့်ပြီး မီးရှို့သတ်ထားခဲ့ကြောင်း၊ အိမ်တအိမ်လဲ မီးလောင်ပျက်စီးသွားကြောင်း ဒေသခံတဦးကဆိုသည်။

ထို့အပြင် အသက်၆၂ နှစ်အရွယ်အမျိုးသားတစ်ဦးကိုလည်း လူသားဒိုင်းအဖြစ်ဖမ်းဆီးခေါ်ဆောင်သွားရာ ယခုထိလွတ်မြောက်လာခြင်းမရှိသေးကြောင်းသိရသည်။

အကြမ်းဖက်စစ်ကောင်စီတပ်နှင့်ပျူပူးပေါင်အင်အား ၁၀၀ ကျော်သည် ရှမ်းတပ်ကျေးရွာတွင်နှစ်ညအိပ်ယာယီတပ်စွဲခဲ့ပြီး ထိုမှတဆင့် ပေလည်ကျေးရွာသို့ ယနေ့ညနေ ၁ နာရီ ၄၀ မိနစ်အချိန်တွင်လက်နက်ကြီးလက်နက်ငယ်များဖြင့်ပစ်ခတ်ကာ အကြမ်းဖက်ဝင်ရောက်ခဲ့ကြောင်းသိရသည်။

ထန်းကုန်းတိုက်နယ်အတွင်းတွင် အကြမ်းဖက်စစ်ကောင်စီတပ်စစ်ကြောင်းထိုးနေသည်မှာ သုံးရက်ခန့်ရှိပြီဖြစ်ပြီး ပျဥ်းတော်၊ညောင်ကိုင်း၊သရက္ကံကြီး၊ကြာဘက္ကံ၊မောင်းတိုင်၊ယော၊ ရှမ်းတပ်၊မင်းကုန်း၊ပေလည် စသည့်ကျေးရွာများထွက်ပြေးတိမ်းရှောင်နေရကြောင်း သိရသည်။