ဆီဆိုင်မြို့နှင့် ကျေးရွာ ၄ရွာကို စစ်တပ်က ဂျက်ဖိုက်တာဖြင့် အကြိမ် ၂၀တိုက်ခိုက်၊ ပေါင် ၅၀၀ဗုံး ရာချီကျဲချ၊ ပြည်သူနေအိမ် အများအပြားပျက်စီး

ဇန်နဝါရီ ၂၆၊ VOR

ရှမ်းပြည်နယ်တောင်ပိုင်း ဆီဆိုင်မြို့နှင့် ကျေးရွာ ၄ရွာကို စစ်ကောင်စီတပ်က ဂျက်ဖိုက်တာဖြင့် အကြိမ် ၂၀တိုက်ခိုက်ခဲ့ပြီး၊ ပေါင် ၅၀၀ဗုံး ရာချီ ပစ်ချခဲ့သည်ဟု ပအိုဝ်းအမျိုးသားလွတ်မြောက်ရေးတပ်မတော်PNLA က ယနေ့ သတင်းထုတ်ပြန်သည်။

ယမန်နေ့ ဇန်နဝါရီလ ၂၅ ရက်နေ့တွင် စစ်ကောင်စီသည် ပအိုဝ်းဒေသတွင်းရှိ ဆီဆိုင်မြို့နှင့် ကျေးရွာ ၄ ရွာကို ဂျက်ဖိုက်တာနှင့် Y12 လေယာဉ်များဖြင့် အကြိမ် ၂၀ နီးပါးတိုက်ခိုက်ခဲ့သည်ဟု သိရသည်။

တိုက်ခိုက်မှုများအတွင်း စစ်ကောင်စီသည် ပေါင် ၅၀၀ ဗုံးအပါအဝင် ဗုံးအလုံးပေါင်း ၁၀၀ ကျော် ကျဲချတိုက်ခိုက်ခဲ့သည်ဟု ထုတ်ပြန်ချက်တွင် ဖော်ပြထားသည်။

ထိုသို့တိုက်ခိုက်မှုကြောင့် ပအိုဝ်းပြည်သူများ၏ အိုး အိမ်စည်းစိမ်များ ထိခိုက်ပျက်စီးမှုအများအပြား ရှိခဲ့သည်ဟု ထုတ်ပြန်ချက်အရသိရသည်။