မောင်တော နခခ ၅ ကိုသိမ်းပိုက်ပြီးဖြစ်ကြောင်း AA ကြေညာ၊ဗိုလ်မှူးချုပ် သူရိန်ထွန်းနဲ့ စစ်သားများ လွတ်မြောက်နေတာကြောင့် နတ်မြစ်အတွင်း ရေကြောင်းသွားလာမှု AA က ပိတ်ပင်

ရခိုင်ပြည်၊ မောင်တောဒေသရှိ နောက်ဆုံးလက်ကျန်စခန်းကြီးဖြစ်တဲ့ အမှတ် ၅နယ်ခြားစောင့်စခန်း နခခ ၅ ကိုသိမ်းပိုက်ပြီးဖြစ်ကြောင်း ဒီနေ့ ညနေပိုင်းမှာ AA က ထုတ်ပြန်ကြေညာပါတယ်။အမှတ် ၁၅ စစ်ဆင်ရေးကွပ်ကဲမှုဌာနချုပ် – စကခ ၁၅ စစ်ဆင်ရေးကွပ်ကဲရေးမှူး ဗိုလ်မှူးချုပ် သူရိန်ထွန်းနဲ့ အင်အား ၁၅၀ ခန့် ထွက်ပြေးလွတ်မြောက်နေတာကြောင့် နတ်မြစ်အတွင်း ရေကြောင်းခရီးသွားလာမှု ကို ပိတ်ပင်လိုက်တယ်လို့ ဒေသတွင်းသတင်းတွေက ဖော်ပြပါတယ်။စကခ (၁၅) တပ်မမှူး ဗိုလ်မှူးချုပ် သူရိန်ထွန်းကိုယ်လွတ်ရုန်းပြေးသွားပြီး မောင်တောမြို့ အမှတ် ၅နယ်ခြားစောင့်စခန်း -နခခ ၅ကို AA မသိမ်းမီ ပိတ်မိနေကြောင်း စစ်ကောင်စီတပ်သားတွေ ပြောဆိုထားတဲ့ရုပ်သံဖိုင်ဟာလဲ ဒီနေ့မှာ လူမှုကွန်ယက်မှာပျံ့နှံ့လာပါတယ်။

နခခ ၅ကို သိမ်းပိုက်ပြီးနောက် စစ်ကောင်စီတပ်ဖွဲ့ဝင်များနဲ့ လက်အောက်ခံ လက်နက်ကိုင်များ ထွက်ပြေးလွတ်မြောက်နေပြီး ရခိုင်ပိုင်နက် နတ်မြစ်အတွင်း ရေကြောင်းခရီးသွားလာခွင့်များကို အကန့်အသတ်မရှိ ပိတ်ပင်တားမြစ်ကြောင်း အာရက္ခတပ်တော် AA က ထုတ်ပြန်အသိပေးထားပါတယ်။အမှတ် ၅ နယ်ခြားစောင့်တပ်စခန်း (နခခ ၅) ကို AA က ဒီနေ့ ဒီဇင်ဘာလ ၈ ရက် နံနက် ၉ နာရီခွဲမှာ အပြီးသတ်သိမ်းပိုက်လိုက်ပြီး မောင်တောမြို့ကို အလုံးစုံသိမ်းပိုက်နိုင်ခဲ့ပြီဖြစ်ပါတယ်။နခခ ၅ ထဲက စစ်ကောင်စီတပ်သားများ၊ စစ်ကောင်စီနှင့် ပူးပေါင်းနေတဲ့ လက်အောက်ခံ လက်နက်ကိုင်တပ်ဖွဲ့ဝင်များမှာ လက်နက်များဖြင့် ကစဉ့်ကလျား ထွက်ပြေးလွတ်မြောက်နေဆဲဖြစ်ပြီး နတ်မြစ်အတွင်း ရေကြောင်းခရီးသွားလာခွင့်ကို ပိတ်ပင်ရခြင်းဖြစ်တယ်လို့ သိရပါတယ်။

နခခ ၅ အနီးအနားသာမက မောင်တောဒေသရဲ့ အခြားသောနေရာများမှာပါ တိုက်ပွဲများ ဆက်လက်ဖြစ်ပွားနေဆဲဖြစ်ပြီး စစ်ကောင်စီတပ်သားများအပါအဝင် မွတ်ဆလင် စစ်သွေးကြွများမှာ လက်နက်များဖြင့် ဘင်္ဂလားဒေ့ရှ်-အာရက္ခနယ်စပ်၊ နတ်မြစ်တစ်လျှောက် စက်လှေ၊ မော်တော်ဘုတ်၊ လောင်းလှေများဖြင့် ထွက်ပြေးဖို့ ကြိုးစားလျှက်ရှိနေကြောင်း AA က သတိပေးထားပါတယ်။မောင်​တောမြို့သိမ်းတိုက်ပွဲကို အာရက္ခတပ်တော် AA က ပြီးခဲ့တဲ့ သြဂုတ်လ ၄ရက်ကစပြီး ထိုးစစ်ဆင်တိုက်ခိုက်ခဲ့တာဖြစ်ပြီး မောင်တောမြို့ကစခန်းများအားလုံးသိမ်းပိုက်ထိန်းချုပ်ခဲ့ပေမယ့် အဲ့ဒီနယ်ခြားစောင့်တပ်တခုသာ ကျန်ရှိနေတာဖြစ်ပါတယ်။ဒါကြောင့် မောင်တောနယ်စပ်မှာ ရှိတဲ့ သုံးလကျော်ကြာနည်းမျိုးစုံနဲ့ ပိတ်ဆို့တိုက်ခိုက်ခြင်းခံနေရတဲ့ မောင်တော နခခ(၅) မြို့သူကြီးတပ် ဟာ နောက်ဆုံးမှာ ထိမ်းချုပ်နိုင်ခဲ့ပြီ ဖြစ်ပါတယ်။