ဗန်းမော် မံစီဒေသတစ်ခုလုံးသိမ်းပိုက်ဖို့ KIA ထိုးစစ်ဆင်၊ ကာကင်းစခန်းအချို့နဲ့ ဗန်းမော်တက္ကသိုလ်ကို သိမ်းပိုက်

ကချင်ပြည်နယ်၊ ဗန်းမော်နဲ့ မံစီမြို့နယ်ကြားရှိ စစ်ကောင်စီစခန်းတွေနဲ့ ဗန်းမော်တက္ကသိုလ်ကို ဒီဇင်ဘာ ၄ရက်နေ့ မှာ ကချင် လွတ်လပ်ရေးတပ်မတော် (KIA) က သိမ်းပိုက်ထားပြီလို့ သိရပါတယ်။ဗန်းမော်- မံစီသွားလမ်းပေါ်ရှိ စစ်ကောင်စီရဲ့ ခလရ ၄၇ တပ်ရင်း ကာကင်းစခန်း ၂ခုဖြစ်တဲ့ ညောင်ပင်သာကာကင်းစခန်း၊ ဖန်းခါးကုန်း ကာကင်းစခန်းနဲ့ ဗန်းမော်တက္ကသိုလ်ဝန်းအတွင်းရှိ စစ်ကောင်စီအခြေချစခန်းကိုလည်း KIA က သိမ်းယူရရှိပြီး လက်နက်ခဲယမ်းများပါ သိမ်းဆည်းရမိတယ်လို့ သိရပါတယ်။

ဗန်းမော်နဲ့ မံစီဒေသရှိ ခမရ ၃၁၉၊ ခမရ ၆၀၁၊ ခမရ ၅၂၃၊ ခလရ ၄၇တပ်ရင်း၊ ညောင်ပင်သာကာကင်းစခန်း၊ ဖန်းခါးကုန်း၊ နမ်ဖား၊ ဗန်းမော်တက္ကသိုလ်ဝင်း၊ မင်းလှ၊ သာစည်စတဲ့ စခန်းတွေကို KIA က ဒီဇင်ဘာ ၄ရက်မှာ တပြိုင်နက် စတင်ထိုးစစ်ဆင်ခဲ့တာဖြစ်ပြီး စစ်ကောင်စီ တပ်စွဲရာနေရာ ၁၀ခုထက်မနည်းကို တိုက်ခိုက်သိမ်းပိုက်ထားနိုင်ပြီလို့လည်း ဒေသတွင်းသတင်းတွေက ဖော်ပြပါတယ်။KIAနှင့်ပူးပေါင်းတပ်ဟာ ဗန်းမော် မန်စီဒေသတစ်ခုလုံးသိမ်းပိုက်နိုင်ရေး စစ်ကောင်စီတပ်စခန်းများကို ဝိုင်းဝန်းပိတ်ဆို့၍ ပြင်းထန်စွာ ထိုးစစ်ဆင်တိုက်ခိုက်နေတာဖြစ်ပါတယ်။ပြီးခဲ့တဲ့ အောက်တိုဘာနဲ့ နိုဝင်ဘာလ ဆန်းပိုင်းမှာ ကချင်ပြည်နယ်ရှိ ဆော့လော်၊ ချီဖွေ၊ ပန်ဝါစတဲ့မြို့တွေအပြင် နယ်ခြားစောင့်တပ်ဌာနချုပ် ၃ခုပါဝင်တဲ့ ကချင်အထူးဒေသ ၁တစ်ခုလုံးကို တလကျော်အတွင်း တိုက်ခိုက်သိမ်းပိုက်ထားပါတယ်။