ပလက်ဝရှိ ချင်းလက်ဝစခန်းကုန်းအား AA သိမ်းပိုက်၊ အလောင်းအမြောက်အများ လက်နက်ခဲယမ်း အမြောက်အများ သိမ်းပိုက်ရရှိ

ဇန်နဝါရီ ၃၊ VOR

ချင်းပြည်နယ် ပလက်ဝမြို့နယ် စစ်ကောင်စီ ချင်းလက်ဝစခန်းကုန်းအား ရက္ခိုင့်တပ်တော်က ယနေ့ သိမ်းပိုက်လိုက်ပြီး လက်နက်ခဲယမ်းအမြောက်အများ သိမ်းဆည်းရရှိကြောင်း AA က သတင်းထုတ်ပြန်သည်။

စစ်ကောင်စီတပ်သား အလောင်းများ၊ လက်နက်ခဲယမ်းများနှင့် စစ်အသုံးအဆောင်ပစ္စည်းအမြောက်အများကိုလည်း သိမ်းဆည်းရမိခဲ့သည်ဟု သိရသည်။

ဇန်နဝါရီလ (၁)ရက်နေ့မှစတင်ကာ AA က ရက္ခိုင်နှင့် ပလက်ဝဒေသအတွင်း၌ ထိုးစစ်ဆင်တိုက်ခိုက်လျက်ရှိရာ ၃ရက်အတွင်း ခမောင်းဝနှင့် ချင်းလက်ဝကို အပြီးသတ်သိမ်းပိုက်နိုင်ခဲ့ပြီဖြစ်သည်ဟု ကြေညာချက်တွင် ဖော်ပြထားသည်။

ရက္ခိုင့်တပ်တော်က တင်းမတောင်ရှည်တောင်စခန်းကို ဇန်နဝါရီ ၁ရက်နေ့နှင့် စစ်ကောင်စီ ခမောင်းဝစခန်းကုန်းအား ယမန်နေ့ ဇန်နဝါရီလ (၂) ရက်နေ့တွင် အပြီးသတ်သိမ်းပိုက်ရယူနိုင်ခဲ့ပြီး ယနေ့ ချင်းလက်ဝကိုရရှိခဲ့ခြင်းဖြစ်သည်။

ပလက်ဝဒေသတွင်းရှိ စစ်ကောင်စီစခန်းကုန်းများကို တစ်ပတ်အတွင်းသိမ်းယူမည်ဟု ရက္ခိုင့်တပ်တော်က ယမန်နေ့က ထုတ်ပြန်ကြေညာခဲ့သည်။